Thursday, 2 September 2010

فوضي الفيس بوك

بعد التحية والسلام


هو ينفع يبقي عندك بيتك و عزوتك و أمانك و تسيبه وتروح ضيف لصاحب جديد من غير ميعاد؟


تتوقع منه ايه وهو مش عامل حسابه انك جاي من بيت معزز مكرم و ليك حبايبك فيه بتزور صحابك وبيزوروك


ولما يكون بيتك هو مدونتك .. وللي ميعرفش يعني ايه مدونه


فالمدونه مش حزب سياسي و لا تجمع شبابي


المدونة زي بيتك بالظبط .. فيها اودتك و قلمك و كراستك و ساعتك


بتلون حيطانها زي ما بيروق لك .. بتزوقها علي مزاجك


و بتتحكم في دخول ال بتحبهم فيها من غير رسائل مزعجه كتير حواليك ولا فوضي الصور المستفزه والناس ال بتتحدف عليك في مكان تاني


ولأن معاناتي بدأت في المكان دا .. اطلقت العنوان باسمه مع معرفتي بوجود مواقع كتير بتأدي نفس الغرض وبنفس السلبيات


نرجع لبيتنا .. مدونتنا ال اهملناها لمجرد ان في مكان تاني بنتلاقي فيه اسرع واسهل و شكله حلو و كمان سهل نشوف فيه اي حد بندور عليه


بس .. بنحس بالغربة في أي وقت


لمجرد ان واحد عمل ريبورت مجهول الهوية فيك .. واداك اسفين محترم عند الاستاذ فيس اللي بيقوم بالواجب معاك وبيطردك


وبتصبح في العراء وحيد وحزين علي فراق حاجات كتير تعبت فيها وذكريات جميله شاركك فيها اصحابك ال اختارتهم يكونوا عنوانك في المكان دا لكل صاحب عنوان و عنوانك بيبان من اول وهله بيتعرف منها اخلاق واختيارات وميول اصحابك


بتفتكر يوم عيد ميلادك لما هنوك و بعتولك الورد و التورته هدايا كتير وطفوا معاك الشمع رغم بعد المسافات


وبترجع حزين لبيتك بتفتح الباب عليه تلاقي الغبار نازل عليك من زعل بيتك منك


العنكبوت بيعشش ع البيوت المهمله وبيجيب لها الفقر


بترجع تنضف فيه و تدور ع ال زاره وسابلك رساله وانت بعيد و ترد عليه و تشكيله همك


بترجع تروق اودتك و تمسح عقارب الساعه بالسبرتو وبتبص لنفسك في المرايه و تبتسم وهي بتشوف ضحكتك


اخيرا رجع الامان تاني لضحكتك .. رجعت لمرايتك وصحبتك


وفاكر تعبير بنوته من بلدي الجميله المنصوره .. اسمها مي


كانت في لقاء مدونين معانا في بوكس اند بينز ويومها عبرت عن حبها للمدونه بتاعتها بكلام جميل وقالت


مدونتي اودتي الصغيره .. فيها برواز بحط فيه صورتي .. و صور صحابي وذكرياتنا سوا


وفيها فازة فيها وردة بينك نفس لون حيطان اودتي


الاوده دي بعيش فيها يومي كله .. بتأنس وحدتي و بتمسح دمعتي و بشوف فيها حكايات حلوه و بفضفض جواها وانا مطمنه


هي دي المدونه الباقيه لنا .. الا لو لا قدر الله يقدر لنا نفارقها وتفارقنا


بس هي المضمونه .. لحد دلوقتي عامل مدونتي المتواضعه


بوكيه ورد


من حوالي 5 سنين .. و مع عدم اهتمامي بيها فهي الوحيده ال لسه ممسحتنيش ولا طردتني من غير سبب


***


هنرجع بيتنا امتي يا مدونين ؟


هنرجع نصحي الاحساس فيه زي الاول و نشجع بعض


هنبقي ايد واحده وندافع علي كل عمل فني و عمل ادبي اتسرق مننا .. وهنقدر


الفوضي خلاص .. بقت


over


أوي


وعشان كدا لازم أوعي ال ميعرفش و كل واحد يدور ويتثقف عشان يعرف يفرق بين الأصل والتقليد


الثقافه ال بايدنا وضميرنا نلفت الناس بيها عشان ميقعوش في تصديق كدب كتير في الفوضي دي


شخص لحود .. تجرأ و ادعي الالوهية بجروب ملعون .. واكتر المترددين عليه ومشتركين عرب ومسلمين


عمالين يشتموا ويتلفظوا بابشع الالفاظ عنده ويزودوا الاشترااكات بدعواتهم للجروب


ايمانا بمبدأ كلوهم بالصوت لا يغلبوكوا


بس دا مش تغيير



بسم الله الرحمن الرحيم


ان الله لا يغير ما بقوم حتي يغيروا ما بأنفسهم


***



واحد زي دا مكسبه انك تدخل عنده و تضيع صلاتك و تلوث لسانك و تزود الناس عنده عشان يحس انه انتصر ونجح


في الوقت ال كان ممكن يتعمله ريبورت من غير ما تعمل لايك اساسا لان ال زي دا مش متأثر بالشتيمه ملزقتش فيه


بالعكس هو زي الشيطان ربنا يحمينا منه ويقينا شره بعد ما يتفك أسره بعد رمضان


بينبسط لما تاخد سيئه وانت بتسبه و بتسب اي حد


الوعي الثقافي للناس مهم اوي .. لان في المكان دا اسهل حاجه الاستخفاف بعقول الناس


اشتغالات كتيره بتحصل .. نوايا مزيفه


واقنعه كتير بتتلبس بمليون شخصية لاهداف كتيره


وطول ما احنا ساكتين طول ما المرض بينتشر اسرع ومحدش بيقوله اقف ستوب ارجع احنا فاهمين


***


استخفوا بعقولنا لما عملوا جروب وسموه تحديت فلان ان هجمع مليون مسلم بيقول لا اله الا الله


سبحان الله


يعني انت بتجر وراك مليون لايك بيسعوا يكملوها عشان بس ترضي فلان ال سعادتك اتحديته


وتلاقي بقي السجيشن شغال .. اشترك بسرعه ولك الاجر والثواب لازم نكمل المليون


و ال باعتلك لو مشتركتش فانت مذنب و هتلاقي حزن ما بعده حزن ولو اشتركت هتفرح فرح شديد جدا جدا بعد تلات تيام اسئل مجرب


اصلها فانتلوب مصيلحي ويا تلحق تنقذه يا هتزعل اوي


بزمتكوا مش دا استخفاف بعقولنا .. احنا محتاجين ان حد يجمعنا مليون عشان نوحد ربنا سبحانه وتعالي


كان الاولي والاجدي انه يشير وصله نافعه لاذكار طيبة كل صباح عند الناس يقروها بينهم وبين نفسهم


فيديو جميل فيه تعاليم واداب اسلاميه تحسنا علي احترام بعض و حفظ لسانا


و أخر المطاف .. الفوضي وصلت لانتحال الشخصيات .. زي ما قريبت امبارح عن اشخاص بينتحلوا اسماء فنانين مش عايشين معانا دلوقتي


و اللي عمل نفسه رئيس جمهورية وال بيشجع الفساد وعامل بنت فاسده زي الوباء بينشر نفسه وسط الناس


و احنا .. بنحاول علي اد ما نقدر نقوقع نفسنا و نحاوط علي بعض


بقينا بنراجع صحابنا وصحاب صحابنا عشان ميدخلش بينا مكير


فوضي


نهايتها في ايدينا .. نفهم ال بنحبهم يعني ايه مدونه نتلاقي بحب في الله فيها


نشجع بعض علي حاجه تفيدنا .. و نساند بعض لما دخيل يدخل بينا عشان يسرق افكارنا ويستغلها غلط


كل ال عنده معلومه هيفيد بيها ال حواليه ميبخلش بيها عليهم


وبكدا هنرجع تاني لبيتنا معززين مكرمين باذن الله


لما تلاقي .. جروب لطيف اتعمل لما قرا خبر في جريدة الكترونية عن نوايا تكوين رقابه امنه لمستخدمي الفييس بوك


وبصراحه مش عارف اشمعني الفيس بوك بس مع وجود قرناء كتير بيملكوا نفس المشكله


والرقابه دي موجوده بالفعل بصوره منظمه و هادئة


لكن مش بجروب واحد عامله بيستغل بيه اسم الحكومة و الداخلية و بيستخف بمدي سطحية الناس ويضع قرار قانوني من غير ما يذكر من مين ولا سنة كام ولا ما يستند باعلان واحد تلفزيوني ولا في الصحف القومية


والناس داخله تهني وتحيي .. اتعملنا قسم بوليس يا جدعان هنا في الفيس بوك


لا وايه دا حصري مش لمصر وبس دا للفيس بوك باللي فيه


دا علي اساس ان مثلا لا قدر الله واحده ع الفيس وداخله باليوزر نيم ال الجروب شم علي ضهره ايده ومتأكد ان هي برقم بطاقتها بعينها الشاكيه


داخله تشتكي الواد محروس بيعاكسها ع الانبوكس وبيقولها .. اشطا يا سوزي


مش كدا وبس لو حد منكم شاف حرامي مدونات زي البنت اياها ال بتقلد سمو الاميره في كل حاجه


يروح هناك هيلاقي ع الوول 10 ظباط قاعدين ميري كل ظابط علي لاب


و معاوني الفيس بوك لابسين البدله الفحلقي ومبتسمين لحضراتكم ومستنيين يجبلكوا حقكوا


في نوت


اصلهم برضه بيشموا علي ضهر ايدهم ان اليوزر دا .. هو الشخصية الحقيقية ال داخله تتشكي والعكس


ايوان دول بوليس الفيس بوك يا جدعان ونازلين بقرار وزاري برقم مميز تلات ارقام نفس رقم عربيتنا قبل ما الارقام تتغير ويتاخد مننا


بس بستغرب ان كل اهتمامات صاحب الافتكاسة الظريفة دي هو اهتمامات سياسية طيب واحد رومانسي ومالوش في السياسية هيستفيد ايه بالجروب؟


يعني ليه ميكسبش ثواب فينا ولما نبلغ عن اكونت منتحل شخصية بنت وبيشتغل بيها الناس ياخدلنا حقنا منه


ليه ميلمش الاكونتات ال عليها صور فاسده ويعملها اجنور


ليه مينصحش الشباب .. يبعدوا عن الجروبات التعبانه و ال بتحرض علي الصداقات الفاسده


و البرامج التلفزيونية الهابطه يااها عيني عينك


ليه بجد .. ياتري هنفضل مصدقين و عندنا الفوبيا .. ال ملخيانا خايفين من هوا مالوش وجود؟


هسيبلكم تكملوا وتقولولي نعمل ايه عشان الناس تتوعي وتعرف حقوقها كويس اوي في حياتها وع الفيس بوك ومن غير ما حد يغلط فيهم ولا يغلطوا في حد


هنقدر مش كدا

13 Responses so far.

  1. يادماغك يابني

    بصراحه المدونة دي بجد بيت الواحد زي ماقلت هي عنوان كل شخص من اول الشكل الخارجي لحد الشكل الداخلي

    مش ينفع نقارنها باي شي تاني

    والفيس مليان بلاوي اصلا غير اللي انت زكرته

    بوست في الجون يامحمد :)

  2. كيارا
    انا عارف ان الظروف دلوقتي اختلفت وممكن متشوفيش ردي اصلاً
    لكن واجب عليا اقولك ان دماغك اجمل و كنت ببقي سعيد جدا بمتابعة التاريخ عندك فعلا المدونه بينت مميز بيجمعنا بناس مميزين
    بتمني المدونه يعاد طريقة تنسيقها عشان اعرف اشارك فيها بنفسيه افضل و يكون في تبليغ لما حد يرد نعرف لان لسه شاييف ردك حالا
    ربنا يحفظك ويقويكي بشكرك من كل قلبي

  3. السلام عليكم
    احسنت يا مونتى
    فعلا موضوع مهم جدا وانت ناقشته كويس جدا
    بس يارب نتعلم
    دومت بخير

  4. فيه تبليغ بدليل انك اول اما رديت جالي الرد علي الميل

    ابقي علم علي ان الكومنت يجيلك علي الميل وهو هيوصل

  5. مدونة التاريخ انا بحبها جدا وبتمني ارجع اكتب فيها تاني بجد

  6. وعليكم السلام ورحمة الله وبركاته يا محمد
    اشكرك علي تواجدك ومشاركتك الجميله المميزة
    بتمني يارب كلنا نساعد بعض اننا نوضح كل غلط عشان نحمي ولادنا منه
    دمت صديقي الغالي

  7. كيارا اول مره أعرف المعلومة دي .. انا منكرش ان شوفت تعليقك من زمان اوي و لانك عارفه ان انا بتلبخ في مليون حاجه وانا ال لابخ نفسي انشغلت تقبلي اعتذاري
    وياريت ترجعي تكتبي في مدونة التاريخ لان هي الوحيده ال كنت بلجأ ليها لما كنت بحب اتثقف عن التاريخ و مازلت ليا واحد صاحخبي مردس تاريخ رشحتهاله في الاستعانه بالمواد و يعرف التلامذه بيها عنده
    وحمدالله علي سلامتك

  8. كيارا طيب ليه مجاليش رساله انك رديتي عندك؟
    انا عاوز اعرف زي ما انتي عرفتي كدا

  9. معاك حق يا مونتي المدونة هي عالمك الخاص
    اما اي شيء اخر فانت ضيف فيه
    تحياتي

  10. اجابه وافية من صديق وفي
    تسلم يا مصطفي هي دي الحقيقه فعلا
    :))

  11. http://www11.0zz0.com/2011/07/18/13/597866725.jpg

    ادخل الصوره دى

  12. ربنا يكرمك يارب حاضر هحاول اكتب تاني في مدونة التاريخ

  13. كيارا دخلت الصورة و فكرت امبارح وعملتها وقولت يا خساره مكنتش عملت كدا من زمان بيضيع مني ردود كتير اهتم ان ارد عليها .. جزاكي الله كل خير يا صاحبة القلب الجميل
    وكل عام وانتي بخير واتمني يكون رمضان جميل وتسامحي كل ال يزعلك واولهم اناااا
    رمضااان كريم :))