#Post Title #Post Title #Post Title
Tuesday 21 September 2010

رساله لأب وام خايفين علي ولادهم .. يعني ايه سلبيات موقع اجتماعي؟

الحقيقة
كان لازم اقول الحقيقه مش الفيس ال له الزنب لأ
عشان كدا هغير التوجيه مش للفيس لل بينشر الغلط في اي سايت اجتماعي وغيره
يعني الكلام دا مش ع الفيس وبس .. علي كل مكان فيه كدب و فساد
أخيراً


أخيراً .. يا فيس طردتني من عندك من جديد .. لتالت مره بعد البومات الذكريات


و أفراح الصحاب و اعياد الميلاد و لبس العيد


بسهوله كدا تطردني من مكاني .. من شقتي الايجار ال عندك اللي كنت عاملك فيها جو بالورد والرومانسيه


و الصحاب المميزين


هو يعني انت مش عارف تتشطر غير عليا ؟


متشطرتش ليه علي الوغد مدعي الالوهيه؟


ما ترد عليا يا فيس وقولي .. يشمعني تطرد ال قال كلمة حق ومتطردش ال بيعمل فتنه وبيتطاول علي رب العالمين الخالق سبحانه وتعالي استغفره لا اله الا انت سبحانك اني كنت من الظالمين


عايز تقنعني بإيه بالظبط ؟


انك بفكرتك الحقيقيه أعظم من ان اقول حقيقتك وتمسحني ومتمسحش الشياطين اللي ساكنينك بافكارهم و صورهم و خططهم و اللي هدفهم ازاي ينشروا الفساد في الارض


استشهد بالاية 32 من سورة المائدة


بسم الله الرحمن الرحيم


منْ أَجْلِ ذلِكَ كَتَبْنَا عَلَى بَنِي إِسْرَائيلَ أَنَّهُ مَن قَتَلَ نَفْساً بِغَيْرِ نَفْسٍ أَوْ فَسَادٍ فِي الأرْضِ فَكَأَنَّمَا قَتَلَ النَّاسَ جَمِيعاً وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً وَلَقَدْ جَآءتْهُمْ رُسُلُنَا بِالّبَيِّنَاتِ ثُمَّ إِنَّ كَثِيراً مِّنْهُمْ بَعْدَ ذلِكَ فِي الأَرْضِ لَمُسْرِفُونَ

(32)


وقبل أن اتحدث عنك سأترك ما قالوه عنك في كيانك جواك ومزود عليه عاشوريات احمد عاشور لتكتمل تعاريفك ويليهم ردي اللي طردتني عشانه يا فوس فوس
وللأمانه الادبية دا لنك عاشور و انا زودت عليه الاحساس ال خلاني
out


*** *** ***

ع الفيسبوك


1


عرفت ناس وهمية


..


ولما قابلتهم


..
طلعوا كدة فعلاً !


2


حضنت الفرحة ونمت


..صحيت من غيرها


..قمت عملت ريفريش


..لقيتها في بروفايلها


!


3


مؤمنين عاملين ملحدين


..ملحدين عاملين مؤمنين


..لكن اللي شفته كتير كانوا ..حيوانات .. عاملين بني آدميين


!........يعني ايه فيسبوك؟....
.......يعني تقعد تتناقش بالساعات والأيام ........
وفي الاخر كل الكلام دا يروح في الهوا ومحدش بيتغير


يعني ايه فيسبوك؟


يعني لما واحدة تتعلم الطبيخ وتيجي تدوق أكلها وتلاقيه حلو أوي تجري ع الفيسبوك وتكتب ستاتس :


أنا فظييييييييييييييعة!


والمطلوب منك إنك تستنج سر الفظاعة


يعني ايه فيسبوك؟


يعني إنك تعيش فيها شوية وتحس بقيمتك ..


اللي يضايقك تعمله دليت وبلوك ..


وكدة بقى مش موجود .اللي يكتب كومنت سخيف ..


أمسحه بالكومنت على طول


اللي بيستظرف أو اللي مش نازلك من زور دخله النار بتاعتك وأطرده من قائمتك


يعني ايه فيسبوك؟؟


يعني إنك تكتب ستاتس


وتبص عليها كدة من بعيد وتقول "ايه يا واد العبقرية ديه"


..تروح عامل لايك! ;)


يعني ايه فيسبوك؟


يعني إنك تعرفنا تقريرك اليومي لشخصك المبجل


.."أنا قررت استحمى النهاردة يا جماعة" !..


....يعني ايه فيسبوك؟؟


....يعني شباب فاضي فاكر إنه مكافح ..


... شباب عاطل فاكر نفسه مثقف ..


... شباب مالوش لازمة .. بقالهم لازمة


يعني ايه فيسبوك؟


يعني إنك لما تحس إنك سخيف وفي نفس الوقت صادق مع نفسك .. تروح تفكر تعمل ريبورت للأكونت بتاعك!
.................
يعني ايه فيسبوك؟
.................
يعني إنك لما تعمل صفحة وتنجح


.. تلاقي 5 مليون صفحة طلعت زيها بتقلدها


..وكل واحد حسب فكره ..عندك على سبيل المثال ..


صفحة "بس يا سيدي وقامت معيطة" ..


قامت فتاة .. بتحويلها "بس يا سيدي وقام معيط" .


.ثم قام إسلامي بتحويلها لــ "بس يا سيدي وقام مصلي ركعتين"


ثم ظهر رد فعل عبثي رائع


.. "بس يا سيدي وقام عمل ريبورت للصفحة"


...................
يعني ايه فيسبوك؟

...................
يعني إنك لما تحب تشتغل في البشر تعمل صفحة يتيمة سب في الله أو الأديان ..


عشان تلاقي 5000 أهطل عمل مليون صفحة للرد عليها !


والأظرف أن تجد كل كارهي الصفحة يدخلوها ليطلبوا من الآخرين الخروج منها !


........يعني ايه فيسبوك؟........


يعني سبوبة لناس وشهرة لناس وبيزنس لناس ..


بكرة حفلة توقيع كتابي "خواطر مونتي المجنونه "بكرة هطلع على إذاعة جيفنز الرسمية .. اسمعوني !

يعني ايه فيسبوك؟


..يعني مولد وصاحبه غايب ..يعني ناس بتتريق ع الدين ..


وناس بتدافع عنه

..ناس عايزة تحرق الفقرا ..

وناس عايزة تقطع فرو الأغنيا ..ناس بتشجع الأهلي ..وناس ملهاش في الكورة ..


ناس بتعشق عمرو دياب ..وناس بتتجنن علي تموره


.........يعني ايه فيسبوك؟..........

يعني ملتقى المرضى النفسيين في كل مكان !

........يعني ايه فيسبوك؟........

يعني إنك لما تقبل صداقة حد ييجي يكتبلك ع الوول شكراً ع الإضافة !

يعني حد يضيف واحدة ولما تسأله عن سبب الإضافة يقولها أصلي افتكرتك سِنجِل !


يعني -إنت كشخص بياناتك واضحة-


لما تقبل صداقة بروفايل وهمي , ييجي بعدها يسألك إنت مين؟


.........يعني ايه فيسبوك؟.........


يعني انك تكتب نوت وتنام ..تصحى تلاقي ناس شغالة بتشتم بعض في التعليقات !


(يلا يا حبيبي انت وهو .. كله على بروفايله .. هنرش مية)


يعني ايه فيسبوك؟

.........يعني هبل طبعاً........


يعني ايه فيسبوك؟


يعني علاقات , حب , خطوبة , علاقة مفتوحة , جواز ..


يعني إنك تكون مرتبط باتنين على بروفايلين ..يعني انك تكون مرتبط بشخصية وهمية ..


يعني لما الناس كلها تيجي تباركلك العلاقة الجديدة في التعليقات ..ومن ورا ضهرك


يعني الناس تقولّك العلاقة ديه هايلة ولما تلغيها .. نفس الناس يقولوا معلش إنت أحسن برضه ..


......يعني ايه فيسبوك؟......


يعني لما الفضا يجيب آخره معاك تروح مألف شخصية وهمية أكثر جرأة من شخصيتك الحقيقية عشان تأكد على كلامك ..


يعني لما الجنان يجيب آخره معاك تروح مألف شخصية وهمية ضد أفكارك تماماً ولا بأس لو تعاركت مع شخصيتك هذه في تعليقات بالسباب رايح جاي .. أمام الجميع !


......يعني ايه فيسبوك؟......
يعني الناس تبطل تعترض على أفكارك ..
لغاية ما تكتشف -بعد ما أكونتك يتقفل-


إنهم كانوا بيعملوا ريبورتات للأكونت بتاعك في صمت وإخلاص!


:) hehe
................


يعني ايه فيسبوك؟
...................
يعني تظبيط بنات ..بتحبي مين من المطربين؟


انتي عارفة إنك فيكي كتير مني !


انتي حبيتي قبل كدة؟أنا معطلك عن حاجة؟


.....يعني ايه فيسبوك؟.....


يعني البنت تبدأ تحط صورتها لما يفوتها قطر الجواز

وال مفاتهاش .. عادي بقي ما هو بابا وماما موافقين مش مهم الشعب ياخدها يشتغل بعضه بيها

حصلت قدامي كتير وياما نصحت .. والمبررات كتير

......يعني ايه فيسبوك؟......

يعني واحدة تيجي تقول : أنا هنتحر يا جماعة !

وكله ييجي يهدي فيها عشان تعقل ماعدا حد بحترمه جداً ممكن يكتب

هتوحشينا !

................
يعني ايه فيسبوك؟
..............
: يعني حد يكتب ستاتس

والدي توفى اليوم!
ويروح ييجي واحد يعمل لايك !


.....يعني ايه فيسبوك؟.....


يعني إنك تحط لينك من ساعة لتجد عليه تعليق من 10 ساعات !

يعني إنك تحط لينك من ساعتين لتجد بعض التعليقات اختفت من عليه ..

يعني إنك تحط لينك من 3 ساعات لتجد بعدها الأكونت بتاعك اتقفل ..

يعني إنك تبعتلهم رسالة عشان يرجعوا الأكونت من 4 ساعات فيطلبوا منك إنك تصور البطاقة أو رخصة العربية وتبعتهالهم عشان يتأكدوا إنك أنت أنت ..يعني إنك لما تبعت اللي عايزينه من 5 ساعات يفضلوا يبعتولك نفس طلبهم

.. بكل آلية

يعني إنك بعد 6 ساعات تظبط نفسك عشان تعمل أكونت جديد

مش دا ال عملتوه معانا يا فيسبوكيه ومع كتير اوي

......يعني ايه فيسبوك؟.......

يعني إنك تلاقي الملحد بقى مؤمن ..المؤمن بقى ملحد ..المسلم بقى مسيحي ..المسيحي بقى مسلم ..

يعني إنك تلاقي الملحد اللي بقى مؤمن رجع ملحد تاني !

والمسلم يقلب يهودي !

والمسيحي يرجع بوذي

!.......يعني ايه فيسبوك؟.......

يعني إنك لما تكتشف إن اللي قارفك في عيشتك بتعليقات خنيقة ممكن يطلع
أخوك .أو صاحبك .أو إنت نفسك !

.............يعني ايه فيسبوك؟..............

يعني جوز خالتك يطلع عمتك !

يعني ايه فيسبوك؟

يعني إنك تحس إن اللي حواليك كلهم متنورين , معارضين , مثقفين !

تطلع للشارع تلاقي عكس الكلام ده ..
وغالباً العكس ده بييجي من نفس مثقفي الفيسبوك !

مع تحيات الفصام

يعني ايه فيسبوك؟

...........

يعني إنك تحب فتاة لأيام وشهور ولو متخلف عقلياً ممكن نقول سنين كمان !

ترفض لقائك لأنها محترمة .

تضع لها صوراً كثيرة لتؤكد على شخصيتها و ترفض أن تريك صورتها لأنها محترمة !

وترفض أن تعطيك رقم المحمول لأنها محترمة !

وفي الآخر تطلع واحد صاحبك بيشتغلك اشتغالة محترمة !

ههههههههههههههههههههههه

أقول هذا الكلام لأني يؤسفني أن أخبركم إني طلعت شخصية وهمية يا جماعة

وده بعد ما عملت تحليل للأسف

ومن ساعتها وأنا مش عارف أعمل إيه ولا أروح فين

"جئت لا أعلم من أي أكونت لكني أتيت كي أقول أن هذه الدنيا زائلة ..لا تسوي شيء و دا اكبر مثال مر علي اختفاء مونتانا من علي شاشات الفيس بوك 24 ساعه ومازالت الحياه تسير

:(

وعشان كدا انا بشكر الفيس علي اللي عمله لانه خلاني ارجع بجديه لمدونتي بيتي اللي بيحترمني ومبيطردنيش مهما عملت .. بيستحملني وبيديني حريتي زي ما انا عاوز .. اشرب نسكافيه .. اضرب زبادوو انا حر بقي .. ولا هيهددني اسكت ولا هيقولي اطلع بره بيتي يا مونتي

يعني عشان قولت

يعني ايه حجج واهيه

يعني انك تسيب الصلاه وانت سامع الاذان عشان متفوتش لحظات الشاتنج السعيده و متابعة الاستتس الظريفه في نهار رمضان

ولما تسيب التراويح .. وقيام الليل عشان تسهر مع شيطان جوه بني ادم تدردشوا وتهزروا و لما متلاقوش حاجه تعملوها تقوموا تناموا قبل ما الفجر يأذن

يعني ايه نايم في العسل بمزاجك ؟

يعني تساير الحريه .. تعمل لطفل 7 سنين اكونت وانت بتعلمه الصلاه تكافئه باكونت عليه وتسيبه يعيش ويشوف الدنيا .. ولا تراقبه ولا تقوله بتكلم مين يا حبيبي .. ولا تتابع اخباره .. ولا تحددله مواعيد عادي ليل نهار مافيش مشاكل اهو مريحك من دوشته .. و تحصد دا .. في عصبيه زايده .. في افكار دخيله كلها غلط .. وفي النهايه تقوله ابقي قابلني لو فلحت

يعني ايه خليك فري ؟

يعني تبقي اورجنال خالص .. فيها ايه لما ابني يعرف الدنيا ويتفرج عليها .. فيها ايه لما يتبعتله جروب مش كويس وانا مسالش عادي .. اهو بيشوف الدنيا وفي مكان امن .. لا راح ولا جه مع انه ممكن يروح كل حته وييجي وهو في مكانه وزنبه في رقبتك انت

*** **** ***

الحقيقه .. انا كل ال كنت اقصده .. هو ان ابلغ رساله لناس معينه .. مديه الامان الكامل لاطفالهم ع النت اللي فيه الحلو والوحش .. ومش معني ان وضحت العيوب ان بوحشه.. بالعكس فيه التقيت باجمل ناس عرفتها في حياتي

بس خوفي علي طفل صغير مبيتعملش عليه كونترول .. وطفل معموله اكونت عادي جدا باسمه وصوره و بيجيله اضافات من ناس مجهولين

خلاني اتكلم من غير ما افكر في ابعاد تانيه ..

هي دي الفكره زي ما قالت كيارا ..
مين اللي ادي لنفسه المساحه يشوف كل دا .. جميل جدا دا ال بتكلم فيه يا كيارا .. الكبير ممكن يدي لنفسه المساحه لكن لما يدي الامان لطفل ميعرفش يفرق بين صح وغلط يبقي هو ال عرضه للمساحات دي ..

عرضه انه يقابل افكار متغلفه ممكن يتأثر بيها بسهوله بعيده عن تعاليم دينه

عرضه انه يدخل في سياسات هو في غني عنها لانه مش في المرحله ال مفروض يتدخل فيها بالحاجات دي

عرضه انه يعيش سن غير سنه .. و يعرف يعني ايه سوري في اللفظ مزه و يقولها عادي جداً ما هو بنات ومثقفه بتدلع بعض بيها و علي الملأ وكانها كلمه عاديه وتنفع تدلع بيها

هو دا ال بتكلم فيه .. ازاي نقدر نقوم جيل جديد .. في مكان أمن .. حتي البلوجر فيه مشاكل زي دي بس فيه خصوصيه اكبر انك بتقدر تتحكم في مساحات اصدقائك بطريقه افضل

ياريت تفهموا اقصد ايه من ال كتبته .. واكيد الفيس في حد ذاته انا مش ضده لان فيه رقابه و خصوصيه ..

المهم دايماً ندور علي طريق افضل وامن

[ Read More ]
Thursday 2 September 2010

تواصل الحب في بورسعيد- دار الايتام 3-9-2010

ابتسامه من طفل يتيم .. بتفرح القلب وبتنسي الهم وبتفرج الكرب وبتجلي الحزن
بتطهر الشوائب جوانا و بتعيد عملية تكرار الحب في الدم .. انا عارف الاحساس دا بحسه اوي لما بشوف ابتسامه علي وش طفل يتيم
يارب اسعد كل يتيم و فرحه وتوجه بالصحه و احساسه بانه له رحم منقطعش يارب اشوفهم بكره في بورسعيد علي خير
ويشفي كل مريض منهم
امين يارب
ياريت نتجمع بكره في بورسعيد و نرسم بسمه علي وجوه أخواتنا الأطفال
ودي تفاصيل اللقاء
[ Read More ]

فوضي الفيس بوك

بعد التحية والسلام


هو ينفع يبقي عندك بيتك و عزوتك و أمانك و تسيبه وتروح ضيف لصاحب جديد من غير ميعاد؟


تتوقع منه ايه وهو مش عامل حسابه انك جاي من بيت معزز مكرم و ليك حبايبك فيه بتزور صحابك وبيزوروك


ولما يكون بيتك هو مدونتك .. وللي ميعرفش يعني ايه مدونه


فالمدونه مش حزب سياسي و لا تجمع شبابي


المدونة زي بيتك بالظبط .. فيها اودتك و قلمك و كراستك و ساعتك


بتلون حيطانها زي ما بيروق لك .. بتزوقها علي مزاجك


و بتتحكم في دخول ال بتحبهم فيها من غير رسائل مزعجه كتير حواليك ولا فوضي الصور المستفزه والناس ال بتتحدف عليك في مكان تاني


ولأن معاناتي بدأت في المكان دا .. اطلقت العنوان باسمه مع معرفتي بوجود مواقع كتير بتأدي نفس الغرض وبنفس السلبيات


نرجع لبيتنا .. مدونتنا ال اهملناها لمجرد ان في مكان تاني بنتلاقي فيه اسرع واسهل و شكله حلو و كمان سهل نشوف فيه اي حد بندور عليه


بس .. بنحس بالغربة في أي وقت


لمجرد ان واحد عمل ريبورت مجهول الهوية فيك .. واداك اسفين محترم عند الاستاذ فيس اللي بيقوم بالواجب معاك وبيطردك


وبتصبح في العراء وحيد وحزين علي فراق حاجات كتير تعبت فيها وذكريات جميله شاركك فيها اصحابك ال اختارتهم يكونوا عنوانك في المكان دا لكل صاحب عنوان و عنوانك بيبان من اول وهله بيتعرف منها اخلاق واختيارات وميول اصحابك


بتفتكر يوم عيد ميلادك لما هنوك و بعتولك الورد و التورته هدايا كتير وطفوا معاك الشمع رغم بعد المسافات


وبترجع حزين لبيتك بتفتح الباب عليه تلاقي الغبار نازل عليك من زعل بيتك منك


العنكبوت بيعشش ع البيوت المهمله وبيجيب لها الفقر


بترجع تنضف فيه و تدور ع ال زاره وسابلك رساله وانت بعيد و ترد عليه و تشكيله همك


بترجع تروق اودتك و تمسح عقارب الساعه بالسبرتو وبتبص لنفسك في المرايه و تبتسم وهي بتشوف ضحكتك


اخيرا رجع الامان تاني لضحكتك .. رجعت لمرايتك وصحبتك


وفاكر تعبير بنوته من بلدي الجميله المنصوره .. اسمها مي


كانت في لقاء مدونين معانا في بوكس اند بينز ويومها عبرت عن حبها للمدونه بتاعتها بكلام جميل وقالت


مدونتي اودتي الصغيره .. فيها برواز بحط فيه صورتي .. و صور صحابي وذكرياتنا سوا


وفيها فازة فيها وردة بينك نفس لون حيطان اودتي


الاوده دي بعيش فيها يومي كله .. بتأنس وحدتي و بتمسح دمعتي و بشوف فيها حكايات حلوه و بفضفض جواها وانا مطمنه


هي دي المدونه الباقيه لنا .. الا لو لا قدر الله يقدر لنا نفارقها وتفارقنا


بس هي المضمونه .. لحد دلوقتي عامل مدونتي المتواضعه


بوكيه ورد


من حوالي 5 سنين .. و مع عدم اهتمامي بيها فهي الوحيده ال لسه ممسحتنيش ولا طردتني من غير سبب


***


هنرجع بيتنا امتي يا مدونين ؟


هنرجع نصحي الاحساس فيه زي الاول و نشجع بعض


هنبقي ايد واحده وندافع علي كل عمل فني و عمل ادبي اتسرق مننا .. وهنقدر


الفوضي خلاص .. بقت


over


أوي


وعشان كدا لازم أوعي ال ميعرفش و كل واحد يدور ويتثقف عشان يعرف يفرق بين الأصل والتقليد


الثقافه ال بايدنا وضميرنا نلفت الناس بيها عشان ميقعوش في تصديق كدب كتير في الفوضي دي


شخص لحود .. تجرأ و ادعي الالوهية بجروب ملعون .. واكتر المترددين عليه ومشتركين عرب ومسلمين


عمالين يشتموا ويتلفظوا بابشع الالفاظ عنده ويزودوا الاشترااكات بدعواتهم للجروب


ايمانا بمبدأ كلوهم بالصوت لا يغلبوكوا


بس دا مش تغيير



بسم الله الرحمن الرحيم


ان الله لا يغير ما بقوم حتي يغيروا ما بأنفسهم


***



واحد زي دا مكسبه انك تدخل عنده و تضيع صلاتك و تلوث لسانك و تزود الناس عنده عشان يحس انه انتصر ونجح


في الوقت ال كان ممكن يتعمله ريبورت من غير ما تعمل لايك اساسا لان ال زي دا مش متأثر بالشتيمه ملزقتش فيه


بالعكس هو زي الشيطان ربنا يحمينا منه ويقينا شره بعد ما يتفك أسره بعد رمضان


بينبسط لما تاخد سيئه وانت بتسبه و بتسب اي حد


الوعي الثقافي للناس مهم اوي .. لان في المكان دا اسهل حاجه الاستخفاف بعقول الناس


اشتغالات كتيره بتحصل .. نوايا مزيفه


واقنعه كتير بتتلبس بمليون شخصية لاهداف كتيره


وطول ما احنا ساكتين طول ما المرض بينتشر اسرع ومحدش بيقوله اقف ستوب ارجع احنا فاهمين


***


استخفوا بعقولنا لما عملوا جروب وسموه تحديت فلان ان هجمع مليون مسلم بيقول لا اله الا الله


سبحان الله


يعني انت بتجر وراك مليون لايك بيسعوا يكملوها عشان بس ترضي فلان ال سعادتك اتحديته


وتلاقي بقي السجيشن شغال .. اشترك بسرعه ولك الاجر والثواب لازم نكمل المليون


و ال باعتلك لو مشتركتش فانت مذنب و هتلاقي حزن ما بعده حزن ولو اشتركت هتفرح فرح شديد جدا جدا بعد تلات تيام اسئل مجرب


اصلها فانتلوب مصيلحي ويا تلحق تنقذه يا هتزعل اوي


بزمتكوا مش دا استخفاف بعقولنا .. احنا محتاجين ان حد يجمعنا مليون عشان نوحد ربنا سبحانه وتعالي


كان الاولي والاجدي انه يشير وصله نافعه لاذكار طيبة كل صباح عند الناس يقروها بينهم وبين نفسهم


فيديو جميل فيه تعاليم واداب اسلاميه تحسنا علي احترام بعض و حفظ لسانا


و أخر المطاف .. الفوضي وصلت لانتحال الشخصيات .. زي ما قريبت امبارح عن اشخاص بينتحلوا اسماء فنانين مش عايشين معانا دلوقتي


و اللي عمل نفسه رئيس جمهورية وال بيشجع الفساد وعامل بنت فاسده زي الوباء بينشر نفسه وسط الناس


و احنا .. بنحاول علي اد ما نقدر نقوقع نفسنا و نحاوط علي بعض


بقينا بنراجع صحابنا وصحاب صحابنا عشان ميدخلش بينا مكير


فوضي


نهايتها في ايدينا .. نفهم ال بنحبهم يعني ايه مدونه نتلاقي بحب في الله فيها


نشجع بعض علي حاجه تفيدنا .. و نساند بعض لما دخيل يدخل بينا عشان يسرق افكارنا ويستغلها غلط


كل ال عنده معلومه هيفيد بيها ال حواليه ميبخلش بيها عليهم


وبكدا هنرجع تاني لبيتنا معززين مكرمين باذن الله


لما تلاقي .. جروب لطيف اتعمل لما قرا خبر في جريدة الكترونية عن نوايا تكوين رقابه امنه لمستخدمي الفييس بوك


وبصراحه مش عارف اشمعني الفيس بوك بس مع وجود قرناء كتير بيملكوا نفس المشكله


والرقابه دي موجوده بالفعل بصوره منظمه و هادئة


لكن مش بجروب واحد عامله بيستغل بيه اسم الحكومة و الداخلية و بيستخف بمدي سطحية الناس ويضع قرار قانوني من غير ما يذكر من مين ولا سنة كام ولا ما يستند باعلان واحد تلفزيوني ولا في الصحف القومية


والناس داخله تهني وتحيي .. اتعملنا قسم بوليس يا جدعان هنا في الفيس بوك


لا وايه دا حصري مش لمصر وبس دا للفيس بوك باللي فيه


دا علي اساس ان مثلا لا قدر الله واحده ع الفيس وداخله باليوزر نيم ال الجروب شم علي ضهره ايده ومتأكد ان هي برقم بطاقتها بعينها الشاكيه


داخله تشتكي الواد محروس بيعاكسها ع الانبوكس وبيقولها .. اشطا يا سوزي


مش كدا وبس لو حد منكم شاف حرامي مدونات زي البنت اياها ال بتقلد سمو الاميره في كل حاجه


يروح هناك هيلاقي ع الوول 10 ظباط قاعدين ميري كل ظابط علي لاب


و معاوني الفيس بوك لابسين البدله الفحلقي ومبتسمين لحضراتكم ومستنيين يجبلكوا حقكوا


في نوت


اصلهم برضه بيشموا علي ضهر ايدهم ان اليوزر دا .. هو الشخصية الحقيقية ال داخله تتشكي والعكس


ايوان دول بوليس الفيس بوك يا جدعان ونازلين بقرار وزاري برقم مميز تلات ارقام نفس رقم عربيتنا قبل ما الارقام تتغير ويتاخد مننا


بس بستغرب ان كل اهتمامات صاحب الافتكاسة الظريفة دي هو اهتمامات سياسية طيب واحد رومانسي ومالوش في السياسية هيستفيد ايه بالجروب؟


يعني ليه ميكسبش ثواب فينا ولما نبلغ عن اكونت منتحل شخصية بنت وبيشتغل بيها الناس ياخدلنا حقنا منه


ليه ميلمش الاكونتات ال عليها صور فاسده ويعملها اجنور


ليه مينصحش الشباب .. يبعدوا عن الجروبات التعبانه و ال بتحرض علي الصداقات الفاسده


و البرامج التلفزيونية الهابطه يااها عيني عينك


ليه بجد .. ياتري هنفضل مصدقين و عندنا الفوبيا .. ال ملخيانا خايفين من هوا مالوش وجود؟


هسيبلكم تكملوا وتقولولي نعمل ايه عشان الناس تتوعي وتعرف حقوقها كويس اوي في حياتها وع الفيس بوك ومن غير ما حد يغلط فيهم ولا يغلطوا في حد


هنقدر مش كدا

[ Read More ]