Sunday 28 August 2011

عيد فطر سعيد .. بوكيه ورد لروحكم الحلوة


كل سنة وأنتم طيبين..
وأنتم مبسوطين و سعداء و بتحققوا كل حلم جميل في حياتكم
كل سنه وإحنا اخوات وإيد واحده و روحنا ونبضنا مصر وفلسطين
و كل بلاد المسلمين و الطيبين
كل سنه و قلوبنا بتحب بعض في الله .. وبنسأل علي بعض في الله وبنشارك الأطفال فرحتهم وبنلعب معاهم لعبهم وبنزور ربنا سبحانه وتعالي بزيارة مريض شفاؤه ودنا

رمضان بيودعنا .. بعد ما جالنا بسرعة أوي بيمشي بسرعه أوي ومالحقناش نرحب بيه قبل ما يمشي ويفرحنا بفرحة عيده السعيد بعتلنا رسالة في
ليلة القدر وبيقولنا..
مبروك لكل الناس اللي ربنا عتقهم من النار وعفي عنهم في ليله القدر.. والحمدلله انه بلغنا ليله القدر انا بحبك قوي يارب ♥♥

بعتلنا الرساله الجميله مع يويا بنوته ..
أول ما شفت الرساله علي بروفايلها فرحت و عبست لخوفي أن يمر رمضان بلا طوق النجاة .. فأنت يا رمضان تكرارك نادر جداً في الحياه ..
اللهم اجعلنا في هذه الليلة من الذين نظرت اليهم نظرة عفو وانزلت عليهم رحمتك ورضيت عنهم .. وغفرت لهم واعتقت رقابهم من النار.. اللهم بلغنا ثوابها ..
اللهم ارزقنا بالجنة برحمتك يا كريم
..اللهم أمين

كل سنه وانتم طيبين يا غاليين ..

كل عام وانتم بخير .. وردة بكل الحب أُهدِيهاَ لأمي الغالية

أٌهديها علي قبر والدي رحمة الله عليه

أٌهديها لعائلتي الكريمة و أصدقائي الغاليين

أهديها لريماس بعبق الغاردينيا

أُهديها وجع البنفسج و حمزة الفلسطيني وسارة وصلوها بحب مصر لفلسطين

أُهديها لجروب كلمات الراقي .. وأغلي أصدقائي " المدونين"
أٌهديها لكم كلكم .. و بعتذر علي تأخيري في ردي علي مشاركتكم الجميلة وإهتمامك بكلماتي البسيطة هنا في بوكيه الورد
عشان كدا أهديت ورودي لريماس و وجع البنفسج
لشعوري بالتقصير في ردي عليهم وعلي كل روح جميلة فيكم
ولو احصيت عدد حبي لكم أخاف أنسي إسم وأنتم بقلبي رغم الوقت والمسافات
فتقبلوا مني الاعتذار و تهنئتي من قلبي بالعيد السعيد اللي بتمني تفرحوا فيه معانا وتشاركونا كل لحظة ومناسبة سعيدة
نفرح سوا أول يوم بعد صلاة العيد بإيفنت أخي العزيز إبراهيم عادل الامام
وشباب المنصورة الحلوين HIKД ˚͜˚

والفكرة .. إننا هنتجمع في ستاد المنصورة الرياضي بعد صلاة العيد وهنستني شوية لحد ما نأمن خروج الناس والشيوخ و إخواتنا البنات في أمان .. وهنتجمع كلنا شباب وبنات و أطفال و عائلات في النادي الاجتماعي ..كل واحد في جيبه مسدسه ورشاشه.. في ايده ازازة المياه بتاعته وكيس مايه كبير وهنبتدي نغرق بعض بالمياه لحظات صغيرة زي مهرجان للفرحة ممكن تكون غريبة في نظر ناس كتير منهم أ.غادة .. بحترم وجهة نظرها لما قالت : في السنة اللي بنبوس فيها أيادي دول حوض النيل عشان يسيبولنا النيل بتاعنا . في السنة اللي اتصالات عاملة حملة إسمها عطشان يا صبايا عشان الناس اللي عايشين في حضن النيل و مع ذلك بيسفوا تراب ، في السنة اللي بيموت فيها الآلاف من الفشل الكلوي عشان ماعندهومش ماية نضيفة يشربوها ، في السنة اللي أنا لسه بافتح فيها حنفية الماية بتنزل منها في أيام لون الكوكاكولا ...إخواتنا الفرافير عاملين حرب مسدسات الماية في الكوربة.. المرح حلو

وعشان كدا حبيت أوضح حاجات بسيطة .. من حقنا كلنا نفرح بالعيد طالما الفرح دا مش هيأذي حد ولا هيجرح مشاعر حد خصوصاً لما يكون الفرحه دي منظمه و بتجمع فيها شمل القرايب والأصحاب وللحظات بنشارك فيها طفل فرحته و بنشارك كلنا ايد واحده قبل دخولنا برسم دخول رمزي نقدر نشارك بيه للتبرع لاخواتنا في الصومال وبطريقة جديدة و جميلة زي دي .. وكل ال بيقدر يشارك اكتر يشارك
وربنا سبحانه وتعالي يجازيه كل خير .. يارب
حبيت أقول ان ال هيشارك في اليوم دا مش فرافير زي ما شافتهم كاتبه لها وزنها ولها كتابات تحترم و تستحق التقدير .. الشباب دول هما نفسهم ال كانوا واقفين قدام عينيا من الزهراء للسلام للاستاد بيحموا بيوتنا كلنا واقفين إيد واحده من غير ما ينزلوا ميدان ولا تحرير و فاكر لما لاقيت إعلان ترشيح صديق أحترمه لعضوية رئاسة مجلس ادارة ستاد المنصورة ومكتوب تحت اليافطة .. إسمه وأنه كان واحد من ال نزلوا في ميدان التحرير .. وانا قولتله مش لازم تكون نزلت التحرير لأن وجودك حوالين أهلك وبيتك اكبر من إنك تنزل ميدان وبيتك في خطر ..
وأنا لا أخجل أن أقول إن أول مره في حياتي أشوف ميدان التحرير بصورة مباشرة
كان يوم لقاء المدونين الجميل يوم زيارة مستشفي أبو الريش الياباني ..
يوم 21/8/2011 الصور هنا
وصلنا من مترو السيدة زينب لمحطة أنور السادات ( التحرير )
في اتجاهنا لمقهي البورصة ..
بصيت حواليا لاقيت عربيات أمن مركزي .. ومدرعات جيش و في ضهري صينية كبيرة حواليها عساكر مغلوب علي أمرها صعبوا عليا وقفتهم وسألت الغالية فاتيما .. هو في إيه هنا ؟ رد أحمد سكر و رامي دي موقعة الصينية عشان كدا عاملين عليها طوق أمني
استغربت وبعفوية قولتلهم انا نفسي اشوف (( ميدان التحرير ))
طبعاً في اللي قالي إنت بتهزر!!
واستغربوا إن اكون صديق لأحمد سووو و ضيااء و إينااس و ماكونش نزلت ميدان التحرير؟
وكان ردي ببساطه ان التحرير كان موجود فعلاً في المنصورة و مشاركتي كانت في بلدي الغاليه المنصورة واللي دور أي شهيد فيها و مصاب و شرطي محترم مايقلش عن كل واحد كان في التحرير .. قاطعني بائع الكبريت .. وقالي / المكان دا يابني هاتحكي لابنك في يوم عنه و عن روحه وتفتخر انك شاركت في ثورة ضد الظلم

نرجع لموضوعنا .. عاوز أقولكم كان نفسي أوووي اوووي أنفذ وعدي اللي وعدته في يوم للأطفال و المرضي في مستشفي الأورام بالمنصورة .. يوم ما زرناهم أخر مره .. بزيارة جديدة ليهم ونفرح معاهم ودا حقنا نفرح .. مهما اتبص لفرحتنا بطريقة سلبية فكلنا قلوبنا مليانه هموم .. خلونا نطلع منها بفرحة متأزيناش ولا تازي حد
دي فكرتي ودي وجهة نظري قدام ربنا سبحانه وتعالي
بشوف اعلانات ايجابيه لمستشفيات في التلفزيون وبكون فرحان بمشاركة القادر و الفقير ولو بزيارة لأخواتنا يارب يشفيهم .. و بلاقي مستشفيات محتاجة المشاركة و إعلانتها قليلة زي
" مستشفي مركز الأورام جامعة المنصورة "

بتمني ننظم يوم ونعمل ايفنت من خلال مشاركه ايجابية لأعضاء ستاد المنصورة وفريق العمل مع أصدقائنا.. المصورين نادي الكاميرا بالمنصورة
Mansoura Camera Club
هاني سرحان وصلاح سليم و فريق العمل الراقي لإيفنت شوارع

.. رانيا الزهيري و فاطمة و ندي الياسمين بمشاركاتهم الايجابية السابقة و نعيد علي الاطفال في المستشفي و نشاركهم يوم جميل
كل سنه وانتم طيبين وليكم أجمل الامنيات

وكحك العيد علي ذوووق سمو الأميرة نيفين

والفرحة في هدايا لعيونكم :))
واطيب دعواتي أهديها بوكيه ورد لكل روح جميلة في حياتي

شكراً مرمر علي سفرتك الحلوة طول شهر رمضان المبارك

8 Responses so far.

  1. كل رمضان وانتا طيب وجدع واخلاق يا محمد

    وقلبك كبير


    دى صفة نادرة
    ومش سهل تكون ف حد
    وانا ببصة واحدة ف وشك
    حسيتها قوى


    ربنا يبارك ف عمرك
    ويديلك على قد قلبك الطيب
    ونيتك الصافية دى

    لو بس مكناش مستعجلين
    كنت خدتك ف جولة تحريرية معتبرة
    انا اصلى من مجاذيب التحرير
    وان شاء الله
    لو مليونية 9/9 اتعملت
    هكون اول نفر هناك
    وساعتها هعزم الكل ييجى
    وابقى تعالى لو عندك وقت
    هفرجك التحرير بتاعنا احنا
    بتاع الناس
    مش بتاع الغربان السودا
    والبيريهات الحمرا بلون الدم


    ميرسى ع الصور جدا
    الناس الحلوة كلها
    كان باين ف عيونها الفرحة
    رغم اننا كلنا تقريبا زعلانين
    لأسباب مختلفة
    بس اللمة حلوة
    وساعة الحظ متتعوضش
    عشان كدا جيت
    رغم كل اللى واجعنى ....
    وكان يوم جميل قوى
    كالعادة
    من ساعة ما عرفتكم
    ومفيش غير الأيام الحلوة وسطكم
    :)

    كل سنة وانتا طيب
    وعيد سعيد عليك
    ان شاء المولى

  2. Baskouta says:

    كل سنة وانت طيب وبخير
    Happy Feast
    Wish you auspicious days.
    Baskouta

  3. كل لحظه وانت بخير وسعاده ويارب يفضل قلبك طيب وابيض
    يارب تعود عليك الايام بكل خير وسعاده

    زهراء

  4. ولتانى حرة


    ☻/ღ˚ •。* ♥♥ ˚ ˚✰˚ ˛★* 。 ღ˛° 。* °♥ ˚ • ★ *˚ .ღ 。
    /▌*˛˚ عــــــيــــــــد ** فــــطــر ** مــبـــاركــــ˚ ✰*

  5. Anonymous says:

    صباحك غاردينيا
    كل عام وأنت بخير
    وكل سنة وأنت في حب وسعادة
    ومش عارفة لو انا ريماس المقصودة :) بس برضو لو مش انا بقولك ان احنا هنا اخوة تجمعنا محبة ويارب نفضل كدا دايما وبشكرك من قلبي لان قلبك دايماً جميل وصافي ودا طبعاً حسيته كتير في كل بوست كنت بقراه ليك :) "
    ؛؛
    ؛
    لروحك عبق الغاردينيا
    كانت هنا
    reemaas

  6. وتالت مره عشان الشكولا

    ههههههه

    كل عام وانت طيب


    ☻/ღ˚ •。* ♥♥ ˚ ˚✰˚ ˛★* 。 ღ˛° 。* °♥ ˚ • ★ *˚ .ღ 。
    /▌*˛˚ عــــــيــــــــد ** فــــطــر ** مــبـــاركــــ˚ ✰*

  7. انا حبيت امر واعيد عليك ، وسعيدة كثير بكلماتك اللطيفة وورودك الجميلة لي ولريماس ، شكرا يا محمد كثير كثير ويارب يكون كل ايامكم في مصر الحبيبة أعياد في أعياد ويبعد عنكم الشر ..
    كل عام وانت بخير اخي الكريم ، ينعاد عليك وعلى الأسرة الكريمة وعلى مصر بالخير واليمن والبركات .

  8. تصوروا مع كل كلماتتكم وشهاداتكم الغاليه دي ليا الا اني اهملت الرد عليكم يا اغلي الناس ؟ خصوصا بعد ما راجعت كلامي وحاولت اشوف انا فعلا علاقاتي عامله ازاي بالناس وهل علاقاتي دي تشوهني خصوصا انها علاقات جميله بناس جواها خير مثلكم ولم تتعدي الاطار العائلي وجو المحب في الله عشان كدا انا بشكر اللي نبهتني و بشكركم لانكم بتدوني الشهادات الجميله دي فاتيما ربنا يحميكي و يخليكي ليوسف و بسكوته جايدا وجع البنفسج ريماس لولا وزهراء وكل ال مر هنا لكم مني كل التحيه وكل الاعتزاز وكلي فخر ان الحمدلله بمتلك اختياري دايما لاحسن ناس ربنا يحميكوا ويحمي من احب وكل سنه وانتم طيبين