!! ساعه ونصف .. انتظر التاكسي انا وصديقي المشمهندس / احمد .. ما هو لسه في سنه تانيه هندسة جامعة الدلتا الموقره
ماشيين بالبدل السوده .. والكرافات البمبي المسخسخ .. وكأننا منظمين سوا الالوان والاحساس .. كل واحد فينا وقف في طريق
طريق رايح وطريق جاي .. مش عارف انا كنت في انه طريق ال رايح ولا ال جاي .. بس طريقي كان رايح علي الاستاد وطريقه جاي من الاستاد .. يبقي كنت انا رايح مش جاي :))
وكل واحد فينا بيحاول يستعطف حنية السواق المحترم ابن الناس .. الزوووووق .. الباشا .. الجمييييل
الحاجات دي كلها قولنهالهم .. مافيش فايده
مافيش تاكسي راضي يروح طلخا .. أبداً
!! وكأن طلخا أصبحت دولة من دول العالم الثالث .. يخشوا الاقتراب منها لإزدحامها الدائم و عدم احتوائها سوي علي كوبري واحد بس
لم تجدي معهم كل المحاولات .. ودعينا ربنا سبحانه وتعالي بعربيه زي ما بنحلم بيها بيقينا انها هاتيجي و تغنينا عن المذلة للتاكسيات
اظاهر من اخر مره يوم فرح صديقي الدكتور خالد شريف .. والتاكسيات معرفين بعضهم ان الراجل دا طول ما هو لابس البدله محدش يقفله
عشان بعد ما يقولكوا .. طلخا خمسه جنيه يا اوسطي
وتفرملوا بقوه وعزم وفرحه
هيقولكوا اطلع بينا علي القسم انا الملاسم / كريم زيدان الكلاااوي
مبتقفش غير لما اقولك خمسه جنيه .. وممرمط الكبير والصغير في الشارع يا بيه منك له
طبعا من يومها .. ولو قولت 10 جنيه محدش بقي بيقف وكانهم حاسين بال هعمله فيهم
صحيح يومها اديته 3 جنيه حقه في الزحمه دي وبزياده ..بس هما فعلا بيزلوا الناس
دول بيمشوووا فاضييين .. ومفايمين العربيه ولا الملاكي .. ومشغلين الصاب وال يشارولهم يبصوله كدا من فوق لتحت ويختاروا بقي ينقوا
توريل .. ناصية السكة الجديده من بره .. المشايه لو بنوتين حلوين كدا ال وقفوهم .. :))
بصينا لبعض .. وقولنا سوا .. الجيش بيقول ايه؟
وجاوبنا بعض في نفس النفس
بيقوووول .. اتصرف
صحيح في الطريق من محطة شل .. لحد الاستاد فهمته ان المثل دا خاطيء بس في حد ذاته اتصرفنا وركبنا الميكروووب بااص
هو كان ميكروووب باص كبير شويه .. بس هو برضه ميكررووب باص
و كان التباعين ال فيه بيعاملوا الناس بطريقه مش لطيفه
دا غير اسلوب طلب الأجره بدون من فضلك ولا لو سمحت
طبعا .. الحمدلله .. احنا كنا فين وبقينا فين؟
دلوقتي احنا علي كوبري طلخا .. وبنعديه و ماشيين علي النيل و بنتفق نشرب قصب ولا خروووب؟
الحقيقه ولا شربنا دا ولا دا .. مكانش في اكياس وانا بحب اشربه بمزاج
اتفقنا علي فواكه استوائية .. و ركبنا تاكسي قالنا من نفسه 5 جنيه
( ابقي فكرني اديك رقمه يا عمده )
انا قلتله كدا حضرتك مش هكدب عليك .. ال اخدته مني 5 جنيه نيللي نيللي في طريق ميستاهلش غير 2 جنيه هيطلع علي تاكسي معاليك شريهان شريهان ومتسالنيش ازاي؟
قالي .. نعم ؟
ابتسمتله في المرايه و سكت .. الفواكه الاستوائيه كانت كفيله بالرد
وصلنا و .. هنا بدأت اشوف الحاجه ال خلتني اعمل النوتس دي مخصوص
في البدايه كانت صدفه جميلة لما شوفت .. ناس أعرفها كويس اوي من زمان زي القائد المحترم العميد / حسن امان .. وطريقته المنظمه في تنظيم الحفله
وصدفه رقيقه .. لما قابلت شباب كتير أعرفهم .. ومنهم ال يعرفني ومنهم ال مايعرفنيش
بس حقيقي .. الصدفه والمواقف دايما بتخليك تعرف اصدقائك وحجم قيمتك عندهم
احساس لزيز .. لما تقابل صديق ليك كان بيقولك دي هتبقي حفله مش حلوه خالص واي كلام و كلها فنون شعبية وعبدالفتاح الجريني .. عشان كدا ما قولتلكش ومجبتش ليك دعوه
وتشوفه صدفه وانت داخل واثق من نفسك في مكان ممنوع انك تدخله.. خاص بالضيوف والعائلات.. علي حد القول .. وتسلم علي صاحبك وتدخل بجرأه اكتر بقي واسطه ياعم .. وفجأه ينشغل صاحبك و .. عدي دي :)
هو ايه الحكايه .. المره دي جه علي بالي برضه محمد علاء .. منصوره سيتي ...
و
H
هما ماجوش ليه يغطوا الحفله دي ؟
اولاد بلدي برضه و احب اشوف مقلاتهم منوره في منصوره سيتي في المناسبات السعيده
دخلت القاعه من الناحيه التانيه.. قدام .. و بدأت أشوف الفكره ال عجبتني اوي اوي اوي
البسيين في النص
و عليه الاستدج .. منسق بطريقة جذابه .. و ديكور رقيق و مميز .. و العاب ناريه و ورود وبيانو و فرقه موسيقيه
و
قدامهم كراسي الدكاتره و رؤساء الاكاديمية و الضيوف من المجر وامريكا .. تمهيد لتكريمهم بعد الحفله
الدور الارضي .. كله بنات .. و حازوم حبيب قلبي طبعا استثناء ..
و سلامه ليا من بعيد وابتسامته كانوا احلي مفاجأه وقتها
كل شباب الاكاديمية زيهم موحد .. البدله الانيقة و الكرافات الازرق مع شعار الاكاديمية لتمييزهم عن الأخرين
كلهم سوا .. كافراد أمن ومسؤلين عن تنظيم الحفله .. بيقوموا بالاشاره لكل الذكور الحاضرين بالصعود لأعلي المبني لأخذ راحتهم في التصفيق والتصفير و التصووير ال هو اصلا ممنوع .. و فك الكبت لبعض الشباب القادم من العصر الفولاذي وهو بيقول بعلو صوته ومش مكسوف من نفسه .. ببحببببباك يا جاريييني .. بحببباك
عدي دي برضه
مش هتكلم للمره التانيه .. والصدفه التانيه في حفله تانيه عن موقف الرجاله من بعضها .. ومعاملتهم بطريقة ذكوريه .. اطلع فوق ياعم
ياعم مينفعش هنا كله بنات
في حال .. لو بنوته حلوه داخله نفس المكان ..
اتفضلي .. منوره .. الحفله جامده علي فكره هتعجبك .. اتفضلي هوصلك للكرسي .. لو احتاجتي اي حاجه انا رقم تليفوني زيرو حداشر اربعه تلاته تلات ستات ... احم
;)
شيء جميل لما تحس بابتسامة من القلب للزوار .. ودا ال كنت محتاجه وانا داخل من بوابة الشباب ..
كنت محتاج ابتسامه تقولي بلطف .. حضرتك مينفعش تقف معانا هنا .. هنا
Females
Filles
Chicas
Ragazze
Girls
بناتيت
بالعربي .. بناااااااااااات
كنت هقابل الموقف بنفس الابتسامه .. و بقبول شديد .. و بحب و برضه هقولهم انا لابس البدله زيكم محدش هياخد باله وهقف مؤدب .. اساسا ال مخليني واقف اعجابي باستايل الديكور والبسين و الجو .. لازم يفهموا حدود عالمي وان طاقتي جوايا بترفض ان أجي المكان دا و اطلع فوووق .. مع حد معرفهوووش .. و أصحابي كلهم تحت وسط الحفله و شعوري باني وسطيهم اكيد هيكون احلي
هما قالولي .. اتفضل اطلع فووووق
ومن غير ابتسامه
طيب بشاور علي صاحبي ال سابني وانشغل تاني .. انا صاحب الأستاذ دا
واظاهر ان طول ما الأستاذ مشغول ومش واخدني في ايديه أبقي زميل عادي و بتمحك فيه
ومازال الصوت يردد .. اطلع فوق .. اطلع فوق .. اجيبه يمين هقف يعني هقف
مينفعش يعني مينفعش .. يابني افتح الطريق انا هاني رمزي في جواز بقرار جمهوري
مينفعش يا أستاااااز .. مخدناش أوامر
:))
طيب .. ما هو العقل الباطن جوايا مبيقدرش يجبر علي مكان هو مش عاوزه .. الا في حاله واحده بس .. لو حسستني بادميتي و انك بتتمنالي وقت سعيد فوق ويا الناس .. لكن لما يكون اسلوبك منفر معايا وانت واحد من منظمين حفله بتنشدلها النجاح اكيد هختار حل من اتنين
اولهم مش هطلع فووووق غصب عني .. ولا هرضي بأمر واقع حتي لو اصحابي واصلين في المكان و شخصيتهم في حدود معينه ومقدروش يميزوني و يعرفوني علي الناس و يعرفوهم بيا و اكون واحد منهم في التنظيم
وهغادر المكان .. بكل ادب واحترام
أو .. هيرجعلي يقيني واصراري ان هكون في المكان دا .. بأمر ربنا سبحانه وتعالي .. وهكوووون معاهم وهساعدهم كمان بابتسامه للولد والبنت ..
والحمدلله وبفضل الله كنت .. و وقفت مع نفس الزميل العزيز ال كان رافض يوقفني معاهم .. صحيح ال له ضهر مينضربش علي قفاه
بس الحقيقه .. ضهرك هو اصرارك وشخصيتك و حبك من جواك انك تعيش وقت لطيف .. وتستمتع بالجو ال هوصفهولكم
بصوا ع الصور .. هتشوفوا فكرتي .. تخيلت المكان دا فيلا كبيره
ع الشمال واليمين .. بلكونات زي بلكونات المسرح .. كل الناس سواسيه .. الولاد والبنات .. الشباب و الاطفال و البركه بتاعتنا .. كلهم سوا .. حواليهم ورود في كل ركن .. و فقاعات صابون
oOoOoOoO Soap Bubbles oOoOoOo
طايره من فوق وكأنها نازله من السما عليهم بتغطيهم وتفرقع كدا طق طق برقه و انتعاش
تبص من البلكونه .. تشوف الالعاب الناريه بتلعب مع الموسيقي طالعه نازله بسيمفونية .. بيتحكم فيها دي جي و ليدر العاب ناريه محترفين .. امتزاجهم ببعض و صوت النار ووهجها قدام الوشوش .. بيعملوا كريزما تخليك تنشط دورتك الدموية برقصه خفيفه او صالصا او مجنونه وانت في مكانك
تحت حوالين الاستدج لافين مع البسين المدعويين .. والعريس والعروسه يكونوا مكان عبدالفتاح لما غني و التانوره و ندي المغنيه وحواليهم اصدقاء العريس والعروسه بيسقفوا ويتنططوا .. البيست هيتفرش باسفنج مقوي و يتبطن بحرير عشان يتنططوا براحتهم وميخافوش من الميه تحتيهم
البوفيه .. اوبن لكل المعازيم ورا كل الترابيزات .. مكان مجهز بكل ما لذ وطاب .. مافيش هنا نظام كل وروح ويبان العدو من الطفس
هنا من اول الحفله هيكون اهتمام بالغ بكل المدعوين
شاي وقهوه ونسكافيه و بينا كولادا .. شيش كباب إينو .. جمبري احمد سوو ..
شوكليت و رز بلبن وبابا غنوج لعيون كل اصحابنا
***********************************************
المكان هيكون واسع اوي .. و يسع كل اصناف الفكر المختلفه
مدونين
كتاب
شعراء
رسامين
أطباء و محاسبين و مهندسين
طيارين و مدنيين
عم احمد وعم امين
كلنا هنا سوا .. في المكان ال اتخيلته كلنا بنحب بعض ومبسوطين
*************************************************
و بعد رقصة السلو .. العريس والعروسه حاضنين بعض باتيكيت .. العريس هو ال بيتحكم في كل حاجه مقبلش لحظه يتغطي بايشارب العروسه .. وعينيه غطت عينيها بحنان .. حواليهم ايدين بتشجع وتسقف بفرحه ..الاضواء والشموع منوره في الميه و قلوب الناس بتدندن مع صوت ماريا كاري و شانيا ومارك و انريكي
وفؤاد خبيني ..
هترمي العروسه 4 بوكيهات ورد كل بوكيه في اتجاه .. عشان متظلمش حد
اضواء الليزر هتتحرك من بره وتعمل إكسات ورا بعض
كدا
X X X
المدعوين هيبصولها ويتابعوها لحد ما تقف الاضواء و تبتدي موسيقي سبايسي دي جي مع اداء دي جي فوده
بإعلان لحظة طيران البوكيه لسعيدة وسعيد الحظ في الحفله ليقوم العروسان بتتويجهم بالبوكيهات و اهدائهم هدية رمزية من بدلة وفستان الفرح
والمفاجأه .. لما بوكيه منهم يقع في البسين و يجازف شاب جريء شارب زيادو قبل الفرح و ينزل يجيبه من الميه ويهديه لأجمل بنوته عجبته في الحفله
**************************************************
رحت بخيالي لأبعد من كدا .. التصميم في حد ذاته لو اتعمل فكرته قاعة فرح في مكان كبير لا علاقة له بكولدج .. هيكون فكره ناجحة بالنسبه لاحلامي .. بتمني تتحقق الامنية دي في جزيرة الورد .. المنصورة الجديدة
**************************************************
وفي نفس المكان .. نفس المكان ال اترفض وجودي فيه .. زيي زي كل الشباب اطلع فوق
وقفت .. رافع راسي بكبرياء و عزيمه .. بحمد ربنا علي نعمته و تيسيره ليا بيقيني هكون هنا
وكنت .. بنظم الحفله من نفس الموقع .. برشد الشباب والبنات لأماكنهم بامتنان لوجودهم وتشريفهم للحفله..
في نفس المكان .. عرفت الصاحب الجدع ال بيعرفني عشان بيحبني لشخصي ..
وعرفت الصاحب ال سلم بالعافيه و سابني عشان يرقص مع الوزاويز و كأنه ميعرفنيش
;))
والحمدلله .. من قلبي بحب الاتنين .. الجدع و الشقي .. ال عذرني لما زعلته من غير قصد و ال معبرش رسايلي علي تليفونه
ودلوقتي هقدم
بوكيه ورد بقدمه وكلي امتنان وحب
بشكر وكلي فخر الي سيدة فاضلة .. ندهت عليا
وانا وسط استاف اتحاد الطلاب
وقالتلي
انت اهلاوي ولا زملكاوي؟
قولتلها :حضرتك ايه؟
قالتلي انا اهلاويه
خلاص انا كمان الدم جوايا احمر .. بس الحقيقه كل اصحابي زملكاويه وانا مشجع للاتنين من دباديب قلبي
تاني مره يتقالي انت شبه وائل جمعه
مع ان مشفتوش في حياتي غير مرتين هو أطول مني و أكيد حاجه تسعدني تشبيهي بانسان بتحبوه
هي وبنتها بشكرهم .. نصحوني في الله
افوق من ال انا فيه و ابطل ادمان نت ع الفاضي وابتدي اذاكر حتي لو مبحبش الرياضة والمحاسبه .. وبدل ما اتكلم بسلبية عن رسوبي الدائم بسببهم في الكلية
أبتدي أحسن من نفسي وأنجح
ان شاء الله .. يارب
***********************************************
بوكيه ورد اوركيد من زوق ريم بقدمه مع خالص الشكر والتقدير لست البيت ال استغربت انها ست بيت بعد كل نصايحها وتكرمها بنصيحة في الله
استعن بالله
صلي بقلب
ادعي ربنا سبحانه وتعالي يعينك علي الفهم و التركيز
افتكر كام مره والدتك ربنا يحفظها يارب اتحايلت عليك عشان تكون حد كويس .. راعي خاطرها
عاااااااااااااااااقب نفسك .. واحرمها و كافئها و اديلها بحب
هتنجح ..
بوكيه ورد .. ليها ولأمي العظيمة أغلي ما وهبني الله سبحانه وتعالي ولكل انسان أهداني عيوبي و مبعدش عني
بوكيه ورد .. لصديقي الصدوق المهندس / مش مشمهندس احمد مجدي
لدعوته لحضور الحفله لله في لله من غير مصالح ولا عشان تظبيطه في حاجه تانيه
بوكيه ورد .. ليكم .. تصبحوا علي خير
رابع يوم العيد
يوم من الايام الجميله في حياتي ..
ختام للعيد باحلي صدف و تعارف جديد بناس حلوين
أول اليوم .. ابتدي بصلاة الجمعة و لمة الصحاب .. و نيه للسفر لرأس البر مع ولاد عمي الاعزاء ..
سلام حار و ذكريات كتيره جوانا في حضن وداع علي أمل اللقاء مع دكتور خالد شريف صديقي العزيز .. مع دعواتي بالوصول بالسلامة للأرض الطاهرة المملكة العربية السعودية بلد الرسول سيدنا محمد صلي الله عليه وسلم اشرف الخلق اجمعين و بلد اعز الناس صحابي وحبايبي في المدينة المنورة .. ودعواتي برجوعه تاني بالسلامة في اقرب وقت عشان نعوض الأسبوع ال طار هوا .. ومالحقناش نرغي سوا زي زمان
*** *** ***
وسط اليوم .. وبعد السلام و الأمنيات و الاطمئنان بالتليفونات علي صديقي العزيز .. العربيه وصلت .. شادي واحمد ناصف ولاد عمي .. و صاحبهم الانتوخ البحقيري .. كدا ناقصنا ماجد والعمده و كرم ... عدوا عليا كانت أربعه ونص وشويه .. اتصلت بأخويا ييجي معانا بس كان بيلعب بلاي ستيشن .. رايحين فين يا ولاد ؟
هنطلع راس البر ونسهر ع الميه ولا نسافر كايرو و ندخل سينما في سيتي و نقابل العمدة والصحبجية ؟
قالولي اتاخرنا علي اتفاقنا كان المفروض نصحي من بدري شويه .. إحنا نطلع علي نادي الحوار نشرب كابتشينو ع البسين .. زي العيد ال فات .. نغير جو .. و نطلع نتعشي بليله عند الفخراني في أجا
لفينا لفتين ع المشايه و شدينا بالعربيه مع عربيات كنا بنشد معاها ليلة العيد من سنين طويله .. ودي اول صدفه تقابلنا جميله .. وصلنا نادي الحوار .. دخلنا النادي و احتارنا نطلب نسكافيه ولا كابتشينو؟ كابتشينو ولا نسكافيه ؟ هما غيروا النظام النسكافيه كان بينزل في مج ازاز كبير .. وفي العيد بقي كل الطلبات بتنزل في كوبايه بلاستيك مشروبه قبل كدا
( هي شكلها كدا تتشرب علي رشفتين )
وكأنها اتشربت قبل ما تتشرب .. مشربتهوش ..
قابلت اكتر من زميل ليا في الشغل .. هو أنا أصغرهم بس هما زمايلي أولادهم أدي شباب وبنات وجو جميل .. استازنت واتمشيت ع البسين .. تخيلت لو المكان دا اتعمل حواليه دي جي و موسيقي هاديه طول الليل زى ال بنشوفها في المسلسلات في الفيلات و الحفلات .. تخيلت لو في حوالين البسين بلالين ألوان احمر واصفر و أرجوان والازرق يكون حبله طويل شويه و الابيض زي الفل يطل بفرحه وسط البلالين ..
اطفال حواليا فرحانين .. بس مالقتش جواهم فرحة العيد ال كنا بنفرحها زمان .. مشفتش المسدس الاحمر ال بيعمل صوت غريب لما تضغط علي الزناد بقوه ينور اكتر .. مالقتش الطياره البلاستيك طايره في السما ولا طفل لابس طربوش ومركب شنب وفي ايده مسدس حبش بيضرب في الهوا زي ما كنا بنعمل والضحكه مكانتش بتفارق الوشوش
حبيت احس انه عيد .. حاولت .. ومع اني مبلعبش كوره شوطت علي الامور الصغير .. جري عليها و شاطها عليا ..
كان عاوز يوقعها في الميه .. ضحكنا سوا ..قلتله المره ال جايه نلعبها كورة ميه.. اوعي تحرم نفسك من حاجه نفسك تعملها بدام مش غلط اعملها :)
مامته ناديته .. و اولاد عمي نادوني .. كدا بصره واحد واحد ياعم ..
انت تروح لمامتك وانا هروح لصاحبي ..ابتسامه ..
الجو ليل .. و المكان مشبع بالماء والهواء والوجه الحسن .. بس الجزيرة بلا منافس .. صحاب و لمة و جو تاني
قرروا يمشوا عشان يروحوا نادي الجزيرة .. تمام ..
*** *** ***
ودي كانت الصدفة التانيه علي التوالي ..
بس كانت اول مفاجأه حلوه بالنسبه لي اليوم دا ..
تخيل بعد صدمة الكابتشينو و برد الليل و السكون و حالة الملل و القلق.. تلاقي دفا ذكرياتك قدام عينيك
مش بس كدا .. دا كمان ذكريات معاها صحابها .. النجوم ال بيتحكي عنهم في الروايات عن المنصوره وجمال ناسها .. خلاصتهم صحابي و صحاب صحابي .. بس صحابي احلي طبعا .. هما الاصل .. و ..
ومطولتش .. حبيتهم يدخلوا يستمتعوا بالبسين بس حذرتهم بلاش كابتشينو .. هما كمان قالولي انهم اتصدموا فيه في نفس المكان قبل كدا .. انا مش قاصد اسوء من الكابتشينو هناك بالعكس .. دا كان الديفو الوحيد في النادي في العيد .. غير كدا الجو كان تمام و البسين كان لزيز و الاطفال .. ياريت تجيبولهم طيارات ورق عشان يحسوا بطعم العيد.. عشان بس صديقي العزيز احمد فوده ميزعلش .. دي حقيقه لو علي ديفو واحد احنا مسامحين
هما كمان غيروا رأيهم وقالوا نلف بالعربيات .. المشايه بتبقي جميله في كل وقت .. واجمل ذكرياتي فيها كانت ايام ما مودي كان بيجمعنا و نجري و الغرز بين العربيات و المطبات ال طرنا عليها .. الهدايا ال كانت بتتعلق في عربيات ال بنحبهم .. و المغامرات ال كانت بتتعمل ولا اجدع مغامر في السينما والعربيه علي سرعتها و صحبي الحبوب بيطلع م الشباك و يعلق الكادو في عربية معشوقته تحت المساحات و العربيتين خلاص .. لولا ستر ربنا و مسكتي للدركسيون ..
*** *** ***
رحنا المالكي .. بس ايه الكلام دا؟
انا سمعت ان الفرع ال عندنا مالوش علاقه بفروع القاهره .. اممم ازاي دا مكتوب ع الورق ؟
طيب هتاكد الاول .. مش هتكلم عن الاكل .. هو كان جو ظريف بلمتنا .. ومكالمه حلوه جاتلي من العمده الغالي محمد ابن خالي .. هو كان واحشني ساعتها .. هو حس ولا ايه ؟ صحيح كان مفروض يبقي معانا النهارده بس اجازته صغيره .. سافر القاهره .. بس التليفون جمعنا من جديد
نعمل ايه؟ كان نفسنا نروح الفخراني.. بس هو القدر .. اتفقنا نعوضها الاسبوع ال جاي ان شاء الله يعني 26/11/2010
الفخراني .. لل ميعرفوش .. هو حلواني مشهور اوي و نضيف اوي و له فرع واحد بس عندنا هنا .. في طريق المنصوره في أجا .. بيعمل بليله بطريقة خاصه .. نفسه في البليله مختلف .. تحس كدا انك حماده عزو بمزاجه وروقانه و سلطنته وانت بتاكل البليلة ال يحيي الفخراني نفسه بيحبها .. انا سمعت انه من العيله .. بس بصراحه الرز باللبن هناك .. اووه .. يجنن .. عم يخبل العقل .. والقشطه عليه تخلي الليله كلها ابيض .. جميله
مين هاييجي معانا للفخراني ؟ .. انا عامل حساب اينووو .. واكيد اينو عارفه نفسها .. مش كدا ؟ انا وعدتك نعوضك عزومة المالكي بالفخراني .. و احنا الكسبانين طبعا .. عشان هنشوفك ;)
*** *** ***
دلوقتي طالعين علي نادي الجزيرة .. يعني شباب وبنات المنصوره .. يعني هتشوف من كل رجل قبيلهو بنات ممكن متشوفهمش غير م البيت للنادي ومن النادي للبيت .. زي نجوم السيما بتوع هوليود ..
شياكه وادب و كانك بتشوف عيله واحده في مكان واحد .. بيتحاكي عنه كتير ..
وبصراحه انا افتقدت الكابتشينو و النسكافيه ال كان بيعمله محسن هناك .. من يوم ما القاعه الزرقا اتقفلت و رجل الكاتشينو سافر .. ايوه سافر .. سافر وسابنا مشتاقين للكابتشينو بتاعه .. هو كان بيعمل فيه ايه ؟ خلانا ادمناه .. ادمان عشقي لمشروب .. ممزوج بعنايه بللبن و الشوكليت ع الوش والرغوه ال بتعمل قلب علي الشفايف .. استطعمها كدا هتلاقيها بقت عامله شكل القلب الابيض .. ايوااا كدا بالظبط
بس انا مدخلتش .. قررت اروح وارجعلهم تاني .. كانت مفاجاه برضه .. ما هو م الاول كنت عامل حسابي ان مسافر راس البر .. خلاص اروح اخلص الشغل بتاعي عشان المدير ميزعلش مني وابقي ارجعلهم براحتي .. اصل دا اخر يوم في اجازة العيد .. واول يوم اعوض فيه .. حاجات كتير .. مممم ... صلة الرحم ال مبقتش زي الاول وبحاول اصلها بطريقه ظريفه .. المكالمات ال قلت مع الصحاب في الاعياد .. ومحاولة مراجعة الاسامي ع الموبايل و الاعتذار لكل صاحب معيدتش عليه .. وبصراحه .. مكنتش لا فطرت ولا اتغديت .. و كانوا عاملين بصاره جامده مونتي .. في البيت وفين وفين لما بيعملوها و قلت اروح الحق شويه بالبصل المحمر .. Yummmy
عديت علي محل الورد ال بعمل عنده كل بوكيهاتي .. أخر مره عملت عنده بوكيه تحفه لخطوبة زميلي العزيز د.أحمد .. اتفرجت ع الورد و ابتسمت .. واتمنيت أغمض عيني وأشوف كل مكان في بلدي ع اليمين و ع الشمال ورد و شجر و فل وياسمين وحب ..
سلمت ع الورد علي وعد اعمل بوكيه جديد في اقرب وقت .. بإذن الله ..
وطلعت من شارع عصفور .. عديت علي بوكس أند بينز .. كان واحشني البيانو .. ورصة الكتب و الموسيقي الكلاسيكيه في جو المكتبة ..
و دي الصدفه التالته .. بشبه عليكي .. ايوه انت ال كنت معانا في الجمعية العمومية في استاد المنصورة
ايوان اهلا وسهلا ازيييييييييك ؟ هو فين محمد علاء
( منصوره سيتي ؟ )
اتش : مجاش النهارده معانا .. ازيك ؟
كويس .. الحمدلله .. صدفه سعيده .. هو في حفل توقيع النهارده ولا ايه ؟
شايف النجوم بتوع النادي جايين ع المكتبه .. اكيد في حفله موسيقيه ..
H : فريق 050 عاملين حفله في المكتبه
ايوه دي حاجه جميله خالص .. يعني اكلم ماجد اخويا ييجي يسمع اغنية ورقه .. بيحبها اوي و حضرنا اول حفلاتهم في استاد المنصوره .. بس ايه دا .. الموبايل فاصل شحن
ميييييييييين .. ايه الصدفه الجميله دي ..
دي N
.. ازيك ؟ فرقنا الاكونت القديم بتاع الفيس بتاعي و جمعتنا الصدفه النهارده من جديد ..
كدا التقيت بناس مميزه كانوا في حياتي و رجعوا من جديد
تبادلنا الابتسامات .. و الامنيات .. وأمام باب المكتبه وقفت فجأه .. عادت لي ذكريات ذلك اليوم .. اليوم ال شفت فيه لاول مره منونه درويش في حفل توقيع ساره درويش .. زوجي مازال حبيبي .. كان في نفس المكان دا .. في توقيت يقارب للوقت دا .. ابتسمتلها علي انها ساره .. وابتسمت وهي عارفه ان ببتسم لساره ..
هييييه .. ايام .. في اليوم دا قابلت ندي الياسمين و الغرباوي و شريف شراقيه و ابراهيم العدوي و كان يوم جميل اوي اختتمته بتوقيع شريف وساره لي علي الكتب وميض حروفهم .. بتوقيع مميز مش لأي حد ;)
فوقني من السرحان مزد كول ع الموبايل التاني .. كويس لسه في واحد موقعش شحن .. مين دا شادي ابن عمي .. مش هاتيجي النادي بقي ولا ايه ؟
قلتله لا خلاص .. خلاصة النادي عندي النهارده خليك انت مع صحابك ولا اقولك تعالي ماتيجي .. هو مزاجه النادي
دخلت المكتبه .. و رجعت للجو المليء بالاشباع الروحي .. كما يقولون دائما بيت بلا كتاب كبيت بلا روح .. حسيت بروحي .. وانا ماسك كتابين اسمهم عشان السناره تغمز للكاتبه .. مش فاكر بس هاجيب اسمها تاني .. الكتابين بيتكلموا عن طرق واساليب العلاقة الناجحه بين الولد والبنت كتاب الولد ازرق وكتاب البنت احمر .. فكرت وقتها اعمل كتاب .. يكون رومانتيكي اوي .. بس هخلي لونه بينك واخضر وازرق و .. ويشاركني فيه ماريا دي كارمن و مونمون و كل روح حسيت رومانسيتها اوي ..
دورت علي بلد متعلم عليها لصديقي العزيز مصطفي شهيب .. لاقيته خلصان .. دورت علي كتاب يوميات بنوته لصديقتي العزيزه باكينام اسماعيل .. قالولي بيجهزوا لحفل توقيع ليها في اقرب وقت .. عناقيد ملونه للصديقه العزيزه حريه سليمان و ثورة السلامه لبسمه اللوفي .. و 212 هيثم دبور ال فاتني توقيعه يوم الاثنين .. دورت علي كتب كتيره ..
ولاقيت كتب جميله ..
بس الحفله هتبدي دلوقتي .. المكان بقي زحمه قوي .. اول مره انزل الدور ال تحت .. عجبني روح الشباب وهما قاعدين ع الارض شباب وبنات و قدامهم اسامه و جروب فريق 050 .. الضوء خافت اوي .. الديكور جميل وبسيط .. هحاول ارفع الصور تعيشوا الجو الجميل دا .. وقفت ع الباب القاعه كومبيلت .. سمعت مفاجات كتير هتتعمل وهتتغني في الحفله .. الشبكه واقعه م الموبايل خالص ومش عارف اكلم اخويا .. ابتدي اسامه يرحب بالموجودين و يقول لسه في حاجات كتيره اوي .. فعلا الدنيا لسه فيها اكتر ..
غني وغنينا معاه .. ورقه .. و الدبدوب .. كله كان بيدو ع الدبدوب .. وفكروني بباستو الدبدوب بتاعي .. و جانا عروسة ماريا دي كارمن .. روح ساره و البنات في تشجيعهم جميله اوي .. تسقيفهم و الميل مع الاحساس يمين وشمال .. صوت الشباب و تعليقاتهم الخفيفه .. سقفت معاهم علي أغنية الورقه و كانت مفاجأة يهنوا ال كاتبها .. محمد محسن .. ال كان واقف جمبي .. صدفه سعيده بجد .. لسه بقوله ال كاتبها فنان .. سمعت اسمه واصحابه بيشاوروا عليه ..
سمعت حكاية احنا باند .. و اختيار اسم 050 الموفق من محمد محسن و امنياتي انهم يفضلوا ايد واحده بنفس الانتماء
مش كدا وبس .. كان في مفاجأه تانيه .. اتغني اغنيتين لامجد القهوجي .. اول ما اتقال اسمه قدامي .. بصيت يمين وشمال هو فين ؟
فرحت اوي .. باند بستايل مختلف و بيغني لفنان مثل امجد القهوجي .. حاجه جميله اوي
و اعدت اقول دا صاحبي .. دا صاحبي هو فيييين ؟
وشويه و بنات رايحه وبنات جايه .. لاقيت امجد جاي .. حيوه ومعرفش يدخل م الزحمه ..
بس ناديتله امجد .. قالي ازيك يا متولي؟
ودي كمان كانت صدفه سعيده .. هو ايه الحكايه .. مش ناقص غير اني احلم اشوف كل ال بحبهم واطلع فوق الاقيهم !
مش هقول ولا اسم .. لو نسيت اسم واحد هزعل اوي من نفسي ..
بس اقدر أقولكم ان بحبكم كلكم وكان نفسي أشوفكم في اليوم دا .. يوم الجمعة رابع يوم العيد ..
طلعت بسرعه فوق ..سلمت علي أمجد القهوجي و الاسره الكريمه .. هو يوم صدف .. اللهم زد و بارك يا أكرم الاكرمين
وافتكرت أيام ياما كنت سعيد فيها وانا بشوف لقطاته علي الجروب بتاعه و أخرها صور اسامه 050 .. اللوكيشن والألوان .. الإحساس .. عاوز من داااا
أتعرفت علي محمد محسن .. و بعد يوم جميل .. كنت متصور ان خلاص خلصت الصدف والمفاجآت .. وقفت قدام مؤمن .. وعلي شمالي كوك دور .. افتكرت مونتانا .. حلواني مونتانا بتاعنا في يوم من الأيام
كلمت شادي .. واستنيت ولاد عمي .. وقرروا يتعشوا بره .. مش متعود علي اكل بره .. مافيش اجمل ولا احلي ولا انضف من اكل بيتي يارب يبارك في صحة أمي وامهات الطيبين اللهم امين ..
وصلنا كاتشب .. كان زحمه .. ماشاء الله .. الناس واقفين مستنيين مكان يفضي .. اختارت كوردن بلو كومبو .. محبتش ادقق في اختياري كانز ولا ماكينه متلجه الفرسكس بحبها زي الفرستو تترش بالكاتشب والمايونيز كل علي حده من فوووق .. راعيت الزحمه .. و دورت علي ترابيزه ..
بالصدفه .. مجموعه شباب واقفين قدامها .. حاجزينها وعينيهم علي كراسي الانتريه الاحمريكا جمب البنات جيراني ال كانوا هناك صدفه ..
اوعي حد يكون سمع حاجه ..
و أخيرا .. انتهي الانتظار و انتهينا من الكوردن بلو .. و عدت لمنزلي وكلي امتنان وشكر يارب اشكرك و احمدك علي الصدف الجميله .. علي كل نعمك التي لا تحصي .. يارب .. دايما متجمعين في الخير .. وكل عيد وانتم طيبين
ينصح عند قراءة هذه النوت .. سماع اللنك دا
http://www.facebook.com/l.php?u=http%253A%252F%252Fwww.youtube.com%252Fwatch%253Fv%253DSAzp-I492CE&h=420a0&ref=nf
Gouvanni
