#Post Title #Post Title #Post Title
Thursday 21 October 2010

الي ملائكة العذاب




اليكم يا ملائكة الرحمة .. يا من توجتم بأطهر الاسماء و أبيض الاسماء وأنقي الاسماء
اليكم .. يا ملائكة اعرفهم .. عشت دنيتهم .. رأيت معاملتهم و اسلوبهم و حنانهم مع المرضي و محتاجين اليد الحانيه
اليكم اهدي لكم هذا النوت .. هحكيلكم عن يومين قضيتهم في مستشفي الجامعه ( الجهاز الهضمي - عنبر 14 )
حالات المنظار والقيء الدموي
يومين عشتهم مع والد صديقي يومين متواصلين بلا نوم و الحمدلله ال اداني الصحه عشان اشوف ال شفته واتألم معاهم واحس بال بيتعذبوه سنين..
مش هلوم علي الجو الكتمه و عدم وجود تكييف والمراوح العلاطنه و الدم ال في كل مكان لان دا مكان استقبال طواريء ومن احسن الاماكن الحكومية ال فيها دعم مادي و ادوات مش متوفره في اماكن كتير واشهد بدا .. يعني الالبيومين ال ب 250 جنيه هناك مجانا ومدعم من الحكومه و دا شيء جميل بس لما دكتور او ممرضه تقول لمريض محتاج كلمه حنينه اصبر عاوز تشيل الابره ليه دا انت بتاخد محلول ب 250 جنيه
علي اساس ان هما بيشحتوله الدوا فإزاي يتألم ويشتكي ؟
علي أد ما تعبت نفسياً من ال شفته علي أد ما بحمد ربنا سبحانه وتعالي علي نعمة الصحة و العافيه وعلي رحمته بقلوب الناس دي ..


شفت ايمان عم رضا وحمده وشكره لربنا


وشه البريء اللي يريح كل انسان برضا ربنا عليه


يارب بحق اذان الفجر دلوقتي تشفي عم رضا و عمو ابراهيم الخلفاوي وكل مريض في الدنيا يارب
:$
اول يوم .. كان يوم استقبال و مش هتكلم عن الاهتمام الجميل و الكبير والكلمه الحلوه ال كانت الممرضات بيستقبلوا بيها المرضي
الراجل ال مات قدام عيني وهو مرتكبله المحاليل و سابوه للصبح جمب المرضي ومحدش كلف نفسه يبعت يوديه التلاجه ووراه واحد تاني وتالت ..
و عادي هما متعودين علي كدا
عمو ابراهيم بيتالم و مستني الفرج .. لما حد يشوف الدم هايجيله ازاي وهو بينزف
بعينيا شفت راجل حاجه لله في لله خلتني احبه .. عيني بتدمع نفسي اشوفه في بيته مكانه مش هنا الراجل لوحده .. بيعطس كل شويه و محدش داري بيه نايم زي الاطفال والمحاليل في ايديه
:`(
ومن وقت للتاني بروح اقف جمبه وابتسمله يبتسم ويدعيلي
دعاه حلو اوي .. كان دايما علي لسانه
الحمدلله .. الحمدلله .. مبيتكيش ولا بيعترض اسم ابنه علي اسمي
محمد


هو دا عم رضا .. اللي جواه الحمد والرضا
كان يناديله اجري عليه .. مبسوط انه بيناديله وكانه بيناديني اقوله ايوه يا حاج يقولي / عاوز شوية ميه علي شفايفي
بلتله قطنه و مشيتها علي شفايفه عشان ممنوع م الميه الكتير
استطعم قطرات الميه علي شفايفه و حمد ربنا ودعالي دعا حلو اوي
يارب يشفيه ويتقبل منه يارب
ولما صحي ابنه حكالي عنه وعن طيبته
الراجل عمره ما تعب تعب كبير ولا كان بيتعالج من حاجه وفجأه جاله التعب دا و اختبار ربنا ليه قابله بحب و بحمد الحمدلله
ولما طلب تاني من ابنه شوية ميه كنت معاه في وسط ليل طويل اوي .. بلله القطنه ومشاها علي شفايفه


وقالنا / انا بحب الميه اوي كنت زمان انام واخدها جمبي وكل ما اصحي اشرب
ابتسمت وقلتله هترجع ايام زمان و هترجع تشرب الميه من الازازه
وبقينا في الليل الطويل اعدت مع اخو مريض كان بينزف قبلها بيوم والله يومين ما شفته نام وساكت وراضي وكاتم في نفسه قاعد مقرفص ع السرير و بيبص للسما
اخوه مقاول في الاردن بيقولي انا معايا فلوس توديه احسن مستشفي بس مش هيلاقي العنايه ال هنا كان واضح من كلامه انه يعني بيقول حجج سوري فارغه اوي
عنايه؟
طيب نفوت دي
وايه كمان ياعم احمد ؟


انا جبته هنا عشان لو بره الدكتوره الخاص هيقلب المريض واسهل حاجه يطلب ادوية غاليه وخلاص وهمه الفلوس وبس عشان ييجي غيره لكن هنا هياخد كل الرعايه و كله مدعم
يعني م الاخر .. اخوه بيقوله انت مستخسر فيا توديني مستشفي خاص يرد عليه


و يقوله اه مستخسرعشان هنا رعايه احسن
قلتله طيب وايه رايك في الصوت العالي بتاع الممرضات و فين وفين لما ييجوا يشوفوا واحد عامل يناديلهم
ايه رايك في الراجل ال عنده غيبوية كبدية ال ولاده كلهم بنات ومحدش معبره في عيلته عشان خلافات قديمه و ولاده سايبينه علي يقين انهم هاييجوا بكره يستلموه جثه؟

ايه رايك قالي م الاخر اهو مستشفي والسلام و كويس ان انا مع اخويا مش مالوش حد ولوحده



الراجل ال عنده غيبوبة .. كان مربوط بالشاش جامد في ايديه ورجليه




عمال ينادي لبناته باساميهم ويناديني يا دكتور يا دكتور ما هو مش شايف غيري وممرضه ورا التانيه بيلموا العزال عشان داخلين يغيروا ويناموا كل اتنين في اوده



كل ما اقربله واحاول اديله الحريه وهو مربوط واخفف الرباط عن ايديه الممرضه تقولي متسمعش كلامه سيبه يكلم دا في غيبوبه ومش دراي بحاجه



قلتلها بس دا بشر والكلام ال بيقوله حتي لو في غيبوبة راضيه وحسسيه انه في حد سامع لان نفسيته



دي هتموته مش المرض



قربتله عينيه صفرا .. قلتله حافظ ايه في القران يا عم



قالي قل هو الله احد



قلتله تعرف تسمعهالي يالا خليك شاطر



سمعهالي واعدت اقرا معاه



و قولتله احكيلي عن ال فاكره ايام زمان ؟



كان بيتكلمن بصعوبة وصوت مش مفهوم وحكالي عن بناته وكان فاكرهم كويس



هو صحيح اللي في غيبوبة مش من حقه انك ترفه عنه؟



ولا تسيبه يدعي علي الناس وهو متكتف؟



طبعا انا من عشرتي لممرضات كتير اشهد بان فيهم ال عنده قلب ورحمة ويستحق ان يحمل لقب ملائكة الرحمه ومنهم مس سميه و احلي ما قد يكون و ناس شفتها بعيني بتعامل المرضي ازاي



لكن لما تيجي الساعه 2 باليل ويطفوا النور و يناموا واولاد المرضي نايمين من التعب بره لحد ما ناديتهم يناموا جمبهم بدل ما يسيبوهم لوحدهم



و حتي صاحبي يتعب وينام مريض جمب والده و طول الليل بين تلاته بيتألموا غير ال نايمين واللي في أخر العنبر وفيهم واحد عايش علي جهاز تنفس .. و اعيش يوم زي ال حصلي امبارح دا



و افضل مستني الصبح ييجي عشان الاقي كيس دم لوالد صاحبي زي ما وعدوا و اول ما الصبح ييجي و اتصل بالصحاب عشان يلحقوا صاحبي ال نايم تعبان هو كمان



ولما لاقيت ال عمل فيها عبيط وال نايم ومبيردش ع الموبايل .. قلت مبدهاش الساعه 8 المفروض يصحوا بقي سعادة ملائكة الرحمه ال نايمين



جريت بسرعه وخبطت ع البيبان .. اعصابي تعبت الراجل تعبان وبينادي علي ابنه وابنه مش قادر يتحرك وبيجيب بلغم جواه دم



صحيت واحده بعد 5 دقايق تخبيط وواضح انها كانت في حاله من النوم العميق وكمان واضح انها كانت لابسه حاجه يعني كأنها في بيتها هي وزمليتها اعدوا يغيروا كيتر علي ما فتحوا بيقلولي خير في حاجه؟



قلتلهم صح النوم صاحبي جوه تعبان وابوه تعبان والناس عماله تنادي ومحدش فيكوا



قالولي طيب احنا جايين وراك اهو
رجعت اشوف صاحبي
والاقي واحده غيرهم جيالي معمصه عنيها و لابسه نقاب بقولها بكل ادب وحب
صح النوم ترد بكل وقاحه وقلة ادب مش شغل حضرتك
بقولها / انتوا نايمين وسايبين الناس ال يعيش يعيش وال يموت يموت
ترد بنفس الوقاحه قلتلك مش شغل حضرتك مين ال تعبان؟
قلتلها صاحبي تعبان من باليل و عايز اكشف عليه
قالتلي يعين مش المريض بتاعنا ال تعبان
قلتلها هو لازم يكون بتاعكوا يعني اتصل بالطواريء ال انا فيها عشان ييجوا يشوفوا صاحبي
بصتلي باستغراب و مشيت
شكرا
دا اول موقف
تاني موقف بعد ما الحياه بدات تعود للمكان و بدا الطلبه ال بيدربوا يهلوا علينا عشان يبتدوا يوم جديد في شكشكة التعبانين عشان ياخدوا خبره في جسم حي .. دا واحده مستفززه جات علي الراجل ال بيبص للسما ومبينمش تقوله ممكن حضرتك انا زي بنتك يعني اعملك ابره عشان ناخد عينه نحللهالك الراجل كان هيعيط بيقولها انا عاوز امشي من هنا مخدتيهاش ليه ف الشكه الاولانيه بتاعة المحلول حرام عليكم كل يوم
البنت حلوه الصراحه واحد من زمايلها تبرع وقاله عشانها حضرتك احنا زي ولادك خليها تجرب وجربت
:(
اول ما قربت عشان تمارس هوايتها علي عمو ابراهيم قلتلها من فضلك بلاش تاخدي عينه فصيلته نادره كذا كذا
قالتلي باستغراب حضرتك لازم تتاخد كل يوم عشان نتاأكد
قلتلها من فضلك ابعتيلي ممرضه هان تاخدها مش انتي ال هتاخديها اتعلموا في حد سليم خديها مني يا ستي بس متاخديهاش من واحد بيتألم من كتر الشكشكه دي
وشاروتلها علي عم رضا قلتلها ارجوكي ابعدي ع الناس الكبيره دي كفايه
وبرضه مصممين يجربوا اي حاجه وفي اي حاجه
واحده ماسكه ايد عم رضا نص ساعه وحطاله الترمومتر تحت باطه وعماله تقسله الضغط بالنبض
والله ما بتعمل حاجه ولا هي فاهمه اي حاجه مبسوطه بشكلها وهي عايشه دور الدكتوره وخلاص وكله بقي رايج جاي عليها يتفرج
:(
البني ادمين بقوال حقول تجارب و لا حياة لمن تنادي اول ما الشباب دول جم اصروا يطردوا المرافقين عشان ميشوفوش اهلم وهما بيتجرب فيهم و في ال راضي وساكت ما هم دكاتره بقي
لاقيت ممرضه جايه عليا لو سمحت ممنوع المرافقين دلوقتي
قلتلها حضرتك انتوا طول الليل نايمين وانا صاحي بقالي يومين منمتش ودلوقتي اطرد؟
بتقولي ممنوع لو سمحت اكتر من واحد مينفعش
قلتلها هو لازم اجيب واسطه عشان ينفع؟
طيب بلاش واسطه الحاله الانسانيه فين .. هو وجودي ضارك في ايه
قالتلي اتفضل وهات ال انت عاوزه
طلعت لدكتوره معرفة دكتور زميلي .. قلتلها يعين مافيش خاطر لدكتور كذا قالتلي انا عشان خاطره هقعدك اكتر من واحد لا
قالتلها يعني هو انتي قانوني دلوقتي ولما الدكاتره والممرضات يناموا طول الليل عادي
شكرا وسبتها ورحت وقفت برضه و شفت بعيني الشكشكه والابداع ال بيجربوه في الناس عشان مصلحتهم ومستقبلهم
ولولا خوفي علي مشاعر و حق الناس التعبانه دي كنت صورت المسخره ال شفتها بعيني
كنت صورت الممرضه وهي قايمه من النوم وباين عليها و بتكلمني بكل برود
بس مينفعش الناس دي زي الحواهر غاليه عندي اوي ومينفعش حد يجرحهم ولا يشوفهم بنظرة رحمه غير ربنا سبحانه وتعالي بس
مش هزود ولا هحكي حاجه
انا بس حبيت اقول لكل واحده معندهاش ضمير ولا واحد معندوش ضمير ربنا اداله نعمة انه يراعيها
مينامش في ورديته ويسيب اكتر من 10 مرضي نايمين بين الحيا والموت و يصحي بكل برود يشخط ويزعق في العيانين وذويهم اصلهم جايين يشحتوا منه
مايسيبش مريض ينادي عليه وميعبروش ويوم ما يعبره يقوله اسكت دا انت بتاخد دوا بالشيء الفلاني
وزي ما بيعلموا الشباب في كلية التمريض ازيا يشيلوا البلاستر من علي الحقنه مخصوص عشان يغيروا التاريخ ويالموا واحد مش مستحمل شكة دبوس كل شوية
يعلموهم ازاي يقولوا
صباح الخير الاول .. يبتسموا ويسموا الله
ويكتبوا ع البلاستر التاريخ من غير ما يغيروه بدام في اييدهم دا
يعملوهم ان الرحمه هي اساس الطب والتمريض مش الفزلكه والتشكيك
انا عذرت والد صابحي ليه بيكره المستشفيات وكنت اول واحد يشجعه انه يخرج من الحياه دي
يارب اخر دعواتي يارب ما تكتب علينا دخلة المستشفيات يارب ما نشوف التعب ولا الاهمال ولا كلمة قاسية من ناس معندهاش ضمير
يارب كملنا بالصحه يارب
ولا عاوز مال ولا جاه يارب الصحه يارب
يارب
يارب
يارب
ادعوا بالشفاء لكل مريض ادعوا لعمو ابراهيم خلفاوي ولعم رضا و لعم الجزار ابو عبدالنبي ادعولهم من قلوبكم ويارب استجب يا ارحم الرحمين


---------------------


تحديث


ادعوا لعمو ابراهيم الخلفاوي بالرحمه هو وابي موتانا وموتي المسلمين والطيبين اللهم امين


* شكر خاص للدكتور / أيمن جمعه علي ابتسامته و سعة صدره معانا و تصريح خروجه لعمو ابراهيم
* شكر خاص للممرضه / ال سلفتني الشاحن عشان اشحن الموبايل
*شكر خاص / للممرضه المتدربه / اللي قالت صباح الخير قبل ما تدي الجلوكوز لعمو ابراهيم

[ Read More ]
Tuesday 5 October 2010

! كلام مش طبيعي


عادي جدا


**

فيه ناس مش طبيعيين.. لكن هما مش عارفين إنهم مش طبيعيين، وبينظروا للطبيعيين على أنهم مش طبيعيين، ولأن الأمور مش طبيعية، فيبدأ اللي مش طبيعيين يتصرفوا على أنهم طبيعيين.. ودي كارثة !!

**

في وسط الأجواء اللي مش طبيعية دي، تلاقي نفسك بتسأل يا ترى أنا طبيعي ولا مش طبيعي!؟، المشكلة انه اللي مش طبيعيين هما اللي هيحددوا إذا كنت أنت طبيعي ولا مش طبيعي ..!

**

لكن هنا لازم نسأل سؤال أهم.. هل الأوضاع اللي مش طبيعية ممكن تبقى طبيعية ؟؟

كمان الأهم من كده، إيه هو الطبيعي وإيه هو اللي مش طبيعي؟

**

وهل هناك أصلا مفهوم اسمه "طبيعي"، ولا كل شيء ممكن يمشي حسب الزمن والظروف ويبقى طبيعي في زمان ومكان معين، وفي وقت تاني يبقى مش طبيعي ..؟

**

*

أساسا الكلام اللي مكتوب هنا مش طبيعي هو كمان


شيء طبيعي ان موضوع زي دا يبقي منقول

MoNtAnA MaStEr Of LoVe
[ Read More ]
Sunday 3 October 2010

عارفه؟

يومين وهيعدوا
وأرجع أشوفك تانى
وحشانى جداً
قوى وحشانى
من 15/3/2010 وانتي وحشاني
عارفه
من يوم ما مشيتى ولا حاسس طعم لأيامى
لا المُـر ممـرر
ولا سكر بيحـلِّى عشانى
كل الأيام تشبه بعضيها
وأنا فيها تايه وحدانى
عارفه
حاسس إن المشوار طال عَ الآخر
والهم جبال عَ الصدر ما راضيه فى يوم تتاخر
ولا لاقى لحيرتى فى عيشتى جواب
ولا أول من آخـر
عارفه
وحشانى بجد ونفسى أجيلك
أرمى دماغى على صدرك وأحكيلك
عَ اللى الأيام عملته فيا وأشكيلك
يمكن أرتاح
أو أنعس ليله
من غير ما دموعى الناشفه على خدودى
ما تغرَّق منديلك!!
عارفه
من يوم ما مشيتى ولا لحظه غبتى عن بالى
صوتك بيونِّس أحلامى
صورتك بتنوَّر أيامى
وأما الدنيا تديق قدامى
تتمد أيديكى من الغيب
عَ السكه تثبت أقدامى
بس اللى معذبنى بجد
إنى لوحدى ومانتيش جنبى
وإنك جداً قوى وحشــــــانى
[ Read More ]
Saturday 2 October 2010

بحبك اوي اوي



عارفه ليه بدوخ وانا معاكي
لأن كل نفس بيخرج مني بتدخلي مكانه انتي لحد ما تخلص أنفاسي
وأدوخ من حبك والغريبة إني بفضل أدوخ لحد ما يموتني حبك
عارفه : أنا خلاص مش قادر أفتح عنيا
لأن آخر حاجة حضنتها قبل ما تغمض هي صورتك
بحس وأنا معاكي إن البرد أجمل شئ في الدنيا
لأني بحتاج دفا وانتي الدفا وأنا بحب احتياجي ليكي
وبحب قلقك وانتي بتسألي ” بتحبني “
لأني ف لحظة سؤالك بدوب في حبك
ببقى نفسي أحضن قلقك وأضمك لقلبي عشان تعرفي بنفسك أد ايه قلبي بيحبك .
حتصدقيني لو قلتلك إني بحب كل تفصيلة صغيرة فيكي
مسكتك لفنجان الشاي وهو في حضن ايدك
القلم الرصاص اللي بتعقدي بيه شعرك
بحة صوتك وانتي لسه صاحية لما بفاجئك بتلفون الصبح
شعرك وهو نازل على وشك مسافر بيحكي قصة حب قلبي بس اللي بيعرف يقرى خطوطها ويسرح في تفاصيلها
ده أنا حتى بحب لبسك لأنه عليكي بيبقى مِنكِ , زيي كده من يوم ما عرفتك وأنا حاسسني مِنك
بحبك وببشوف جمالك بيكبر على ايديا زي طفل صغير بحس انه حته مني , ايوه متستغربيش بحسك حته مني أو أنا حته منك لحد ما بقيت أحس بغربة لو ثانيه بعدت عنك
ولما بنسيب بعض بعد اللقا بحسني رحت معاكي ورجعت ب… بلاقيني مرجعتش ,

دايما بنساني في شنطة حنانك وانتي بتكوني عارفه اني نستني عندك وبتمشي من غير ما تقولي عشان ارجع تاني أكلمك وأخدني منك ويا رتني بقدر أخدني منك
حتصدقيني لو قلتلك إني مبشفش أي حاجة غيرك وانا معاكي
لا بشوف الطريق ولا العربيات ولا البنات ولا الشباب ومبعرفش أنا رحت فين وجيت منين غير إني غرقت في عينيكي واتلقاني قلبك

حتصدقيني لو قلتلك إن أي مكان بتيجي فيه بحسه بيتلون بالورد
والنهار والجمال لحد ما بقيت أعشق كل الأماكن اللي شفتك فيها
وشربنا فيها فنجان حب سوا وبعشق الدوار اللي بيضني قلبي لما بيضم نبضك وبعشق سماعة التلفون اللي حضنت صوتك والورق اللي باس ايديكي وانتي بتكتبيلي وحشتك
حتصدقيني لو قلتلك إني لأول مرة في عمري أخش انام وأنا فرحان ببكره لأني حشوفك فيه
إنتي عارفه اني مبقتش أشيل هم أي مشكلة تحصلي ولا ازعل على أي حاجة بخسرها لأني حرجع في آخر اليوم اضمك وانسى همومي في حضنك

انتي عارفه إني أول مره في حياتي أحس إني بحب كل الناس اللي بيحبوني واللي مش بيحبوني وأغرقهم حب لأنك ملتيني حب وبقيت بدل ما باخد من الناس بدي
ياااه تصوري أنا حبيت الكتابة عشان بكتبلك
عشان تمسكي كراستي وتغرق في عيونك وبعدين تخطفني عنيكي وهي بتسألني بأحلي نظره حب وكسوف وفرحة ” الكتابه دي ليا أنا يا مونتي” وقلبي يوجعني

واقول أيوه أيوه يا قلبي يا روح قلبي مونتي مكنش مونتي قبلك ولا حتى بعدك
قبلك مكنش فيه حياة وبعدك بقيتك انتي ومبقتش عارف فيني منك
انتي يمكن بتقلقي ساعات لما بغيب عليكي بكلام يطمن قلبك وانا عمري كله بقى خوف وقلق ثانيه تعدي من غيرك
حد يدخل الجنة ويقدر يرجع لحظة للنار
حد يقدر يدخل قلبك ويعرف يعيش ثانيه بره نبضك

عايزاني اقول بحبك
حتصدقيني لو قلتك إن نفسي بيتقطع لو فكرت ف لحظة قد ايه بحبك واني بكتبها عشان اقدر اقولها وعشان متقلقيش عليا لو قلتها قدامك وتعبت منها لأني حقيقي بيقتلني قلقك
عارفه : بعشق طفولتك وأضم حلم لقيته فيكي ولما بتعب تكوني أمي وانام في حضنك غرقان حنان
عارفة بحب ابتسامتك وفرحة عنيكي لما نتقابل ونقع في عنين بعض دوبنا الاشتياق ونسند بعض عشان نقف واقولك وحشتيني وتقولي وحشتك ونرجع نقع تاني وتتبعتر اشواقنا في عيونا
عارفه : أوقات كتير ببقى نفسي اقولك بحبك
وعمري ما عرفت اقولها زي ما انا حاسسها ولا عمري حعرف
عشان كده برجوكي وحياة أغلى حاجة عندك حسيها جوايا انتي
حسيها وارحميني من انتحاري على الورق عشان اعرف مرة أقول بحبك

** ** **

بهدي احساسها لحبيبتي .. معشوقتي


وكأن عشاق العالم يفيضون عشقا لكي يصل اليكي انتي فقط يا معشوقتي


ودائما وابدا


اعلمي يا حبيبتي .. انك وردتي .. ارويها بالحب و احصد من عيناها السعاده كل يوم


Montana Master of Love



[ Read More ]