Friday 2 September 2011

حكاية العيد .. الجيش والشعب بيلعبوا مع بعض

زي أي إنسان عنده مشاعر وأحاسيس شاركنا فرحتنا في عيد الفطر المبارك ..
لأول مرة .. ستاد المنصورة ستاد بلدنا ..

يتبني رعاية فِكرَة إيفنت ترفيهي للأعضاء وذويهم وإتاحة فرصة مشاركة الأطفال فرحتهم في ليلة عيد
بحرب مسدسات الماء كفكرة جديدة من نوعها في المنصورة ..

وتجربة لتطوير أنشطة ستاد المنصورة في كل المجالات..

الفكرة إننا إتجمعنا بعد صلاة العيد مباشرةَ وإنتظرنا خِلو الإستاد منَ المُصَلِين و بنظام راقي قدم كل واحد فينا الرقم الكودي الخاص لدخوله النادي الاجتماعي للمشاركة في لعبة حرب مسدسات الماء .. والتبرُع بمبلغ رمزي وقدره 5 جنيهات
حد أدني قابل للزيادة في حدود مقدرة كل مُشارك ..
ممكن الصوة دي تتنشر علي النت بسرعة انتشار صورتنا مع المجند الجميل!!
الفكرة مُبادرة ناجحة بتعاون مجلس إدارة ستاد المنصورة الجديد و أعضاء مجلس الادارة بمشاركاتهم الإيجابية مع أعضاء ستاد المنصورة ..
خصوصاً إن الايفنت حصل
في نفس اليوم مع إيفنت حرب بمسدسات الماء في الكوربة وردود المشاركين في الايفنت افادت بظهور أكتر من مشكلة سلبية أثرت علي نجاح إيفنت الكوربة
شوف دي
أضغط هنا

بإختصار إيفنت الكوربة واجه مشكلة تعدي حدود اللعبة من بعض المشاركين و تناوبوا برشق بعضهم بالطماطم و البيض وإثارة الشغب في المكان و إيذاء المارين وتخريب السيارات .. وظهور غير حضاري بعدم احترامهم للفكرة الظريفة دي

الحمدلله .. علي العكس تماماً وجدنا منتهي الرقي في إيفنت ستاد المنصورة بمشاركات الأعضاء وتراحمهم مع بعض ومشاركة الاطفال والصور تتحدث عن نفسها

ماجد أخويا بيلعب مع البنوتة الصغيورة والسعادة في عيونها وهي بتغرقه بالماء
تكوين أكتر من فريق منافس .. وهنا يظهر فريق السييييل عوااااا
وهنا مثال جميل لتسامٌح الدين الإسلامي الراقي ليكون درس للمتعصبين الإسلام دين تسامح وتراحم ورُقي .. بمشاركة صديقي أ.أحمد عادل .. اللعب مع الاطفال والكبار ورسم إبتسامه علي الوجوه بصورة تذكارية جميلة زي دي

علي الرغم من التصويت في موقع الأستاذ / عمرو خالد

أضغط هنا وأعمل لايك للصورة في مسابقة التصويت
إلا أن الصورة مانتشرتش بسرعة إنتشار صورتنا مع الجندي المحترم
وهنا صورة بتجمعنا مافيش فرق بينا ولا مسلم ولا مسيحي ولا شرطي ولا مجند


زي أي إنسان عنده مشاعر وأحاسيس شاركنا فرحتنا في عيد الفطر المبارك ..

حبينا نشارك مع بعض فرحة العيد زي ما الشعب كله متصور مع الجيش بعد الثورة ورافعين شعار الجيش والشعب إيد واحده ..


ماشوفتش حد قال عن الصورة الروعة دي الجيش حنين علي أطفال الشعب !! after the revolution in Egypt, the Army was so admafter the revolution in Egypt, the Army was so admired by the people that everybody wanted to take a photo with any army entity .. Thnx Mohamed Hakim

صورنا في العيد كلها ماتختلفش عن الصور الجميله هنا .. إلا أن في ناس هاوية تألف وتتوقع حاجات و تكبر حاجات وتصنع منها مشكلة كبيرة من لا شيء .. إيه اللي أختلف يعني أن إحنا رفعنا الصورة دي قبل بقية الصور العادية مع العساكر؟

وللمعلومة الجيش بيماك حكمة تفهم الصورة الجميلة .. وليس بالسطحية التي تجعله يعاقب عسكري لم يذنب بمشاركته فرحة المصريين .. وممكن يكون دلوقتي في مكانه وميعرفش بكل الضجة اللي اتعملت علي صورته وواقف خدمته
بيبسح الخالق الكريم

في مقولة عجبتني بتقول
الحياة قد تصبح رائعة إذا تركك الناس وشأنك.
لـِ شارلي شابلن


*** *** *** *** *** ***

الجندي المحترم .. الشاب المصري الجميل ..
قابلته من أسبوع أثناء رجوعي من القاهره بعد لقاء المدونين وزيارة مستشفي أبو الريش الياباني للاطفال .. أتعرفت عليه أنا وأستاذ وليد الزهيري
( مدونة عارفة مش عارف ليه )
وعرفت أنه من القاهره وجيشه في المنصورة و كان كله سعادة ورضا بكونه جندي مصري زينا بيخدم بلده بكل إمتنان


* إنسان محترم جواه حب لبلده ومسلم امره لله و راضي بنصيبه ..

* علي وشه ابتسامة ورضا رباني جميل .. وكل كلامه سيبها لله ..

* إتسحرنا سوا ووصلنا المنصورة وسلمت عليه وسعدت بمعرفته علي وعد بلقاء ..


وجمعتنا الصدفة من جديد .. بعد نهاية الإيفنت الجميل .. شاركنا رئيس مجلس الادارة بالتقاط الصور بروح العيلة الواحدة وأعضاء مجلس الإدارة معانا روح واحدة و البنوتة الصغيورة فرحت بصورتنا مع المدرعة و العسكري بيبتسم حوالينا بفرحه

العسكري دا انسان زينا ..عنده مشاعر وأحاسيس بيحس و بيفرح وبيزعل وعينه بتسهر طول الليل وفي عز البرد واقف علي رجليه بيقول مليون تمام عشان متغفلش عين زمايله ولا عينه عن حراسة أمننا أمن مصر ...

عيناه التي وعده الله سبحانه وتعالي لا تمسهما النار يوم القيامه ..


شيء طبيعي رفعنا صورنا علي النت وإحنا فرحانين بمشاركتنا صحابنا فرحتنا بالعيد وبنثبت للعالم إننا متراحمين و إيدنا واحدة و زي ما بنقدر نشارك بضمير في عملنا و بنتعب في شغلنا و بنقدر نقول للظلم لأ في ثوراتنا.. وبندافع عن حقنا .. بنقدر نشارك الطفل فرحته في عيدنا وبنعيد ذكريات الطفولة بشكل لطيف من غير ما نهدر كرامتنا أو نقلل من نفسنا بمشاركة سلبية لا قدر الله .. بنشارك بحب بلمسة بسيطة بزيارة الأطفال في المستشفيات و بالتبرع لاخواتنا في الصومال ..

عشان كدا حبيت أعمل النوت دي وأقولكم الحقيقه المثيرة للجدل ..
حبيت أحكي الحقيقة قبل ما يفتي فيها من لا يعلم وتسمعوا حكاية العيد المنتشرة علي الفيس بوك في ثواني ..

وعارف إنها هتنزل في المجلات و هتتكلم عنها الصحف ومش بعيد نلاقيها الصفحة الأولي في جرائد مشهورة وتشارك في البرنامج الناجح للدكتور / باسم يوسف ..حقيقي بتمني لإحترامنا لفكرته وعرضه للرأي والرأي الاخر

بروحه الجميلة وبدون تفكير سطحي ..

بنشكر الثورة اللي عرفتنا علي ناس جميلة زي دكتور باسم

*** *** ***
العسكري المٌخلص دا استأذناه يتصور معانا صورة بشكل مختلف صورة فرحت ملايين القلوب في الدنيا .. رغم بساطتها.. مكانش واقف خدمة ولا كان شايل سلاحو اتخلي عنه لأي سبب زي ما بعض الناس فاكرين.. شوفناه مبتسم وفرحان من بعيد..قربنا نتصور جمب المدرعه و شاركناه فرحتنا ومسكناه سلاحنا و بعفوية كلنا مثلنا دور الأسري وإحنا مبسوطين بشجاعة الجندي المصري قدام أي عدد ولو حتي بمسدس ماء

بسرعة بديهة قام صديقي الغالي / صلاح سليم .. بعدسته الأنيقة بالتقاط صور بتضفي رونق جمالي رائع لينا

صلاح سليم ابن عم شهيد ثورة المنصورة / محمد جمال سليم ..
شهيد قدم حياته هدية لمصر عشان نعيش الحرية

أحب أقولكم ماتدوروش علي الحُرية طول ما أنتم بتحكموا علي أي حاجة من غير
ما تسمعوا ..

في لحظة إتحولت فرحة العيد لصورة بتتنقل في المواقع والمنتديات و علي الفيس بوك وكأنها حدث لم يسبق له مثيل .. والشعب المصري خفيف الدم إنهال بالتعليقات علي صورتنا ولسان حال الناس صعبان عليهم العسكري اللي اتعرض فجأه للتهديد لمجرد انه شارك في صورة فرحة بالعيد

الصورة إنتشرت بصورة غريبة و التعليقات منها الطريف ومنها الفرحان ومنها اللي فاهم غلط وفاكرها ضيعت مجد الثورة ..


..فاجئني أصدقائي المدونين اليوم بمبادرة المجلة الجميلة

كلـمـتـنــــــــا

أول مجلة راسلتها من سنين وسعدت بتعرفي علي فريق العمل بيها ودعوة افطار رقيقه مع الفنان شريف منير في النايل سيتي من سنين

ويجمعنا الصدفة اليوم مره تانيه.. بمقال مختصر عن الصورة وصفوها فيه انها اثارت جدل ؟ طيب ليه؟

أضغط هناااا

دا مش أول ولا أخر واحد من الشعب وجندي مصري أصيل بيشارك بفرحة العيد

*** *** ***

واحد داخل بيعلق عليها في جروب المزاريطة وبيقول الصورة دي قديمة أوي مع انها مكملتش 4 أيام :))

يعني إيه كوكاكولا زيرو؟ يعني تتصور مع صحابك في أول يوم العيد مع المدرعة والعساكر وييجي واحد يعمل كومنت في جروب ويقول الصورة دي قديمة أوي وانا اللي مصورها ههههه

أضغط هنا

و هنا واحد بيتحسر علي الثورة وفي دماغه ان الصورة لها نواحي سياسية ماشاء الله راجل غاوي تأليف مخدش باله أن الثورة وأي نجاح بإيد ربنا سبحانه وتعالي ..

في جروب بورتو طره من أجلك أنت

أضغط هنا

وفي جبهة التهييس الشعبية كمان
أضغط هنا

كلنا فاكرين فرحة الشعب بالجيش أهله وناسه و حبايبه بالروابط دي
وفاكرين كمان محاولات إستغلال كلمة السر مصر .. في إننا نقع في بعض لمصالح الاعداء والمصلحة الشخصية للفئويين
أضغط هنا

*** *** ***
بس مش ناسيين الصورة دي .. وزي ما الجيش بيدي الأمان لمصر .. بيدي الحنان لأهل مصر .. وبيكون حازم مع كل مقصر و غادر .. وأكيد بيدي الرحمة لقلوبنا بحكمة ..
ومتفهم الروح الجميلة في الصور ..
وكانت مشاركاته إيجابية في مشاركة الفقراء والمحتاجين بموائد الرحمن في رمضان


وأخر مشاركة لبوست فاتيما .. الجيش بيلعب فيه وبيشارك في دورات رمضانية

معلش بقي يا فاتيما مافيهاش حاجه نلعب بدام مش في أذي لحد


دي مصر ضحكة طفل بريء .. حافظوا عليها
دي مصر .. وردة وشعب وشرطة وجيش .. إهدوها حبكم

دي مصر .. أنا وإنت إيد واحدة وفي إيدينا وردة

دي مصر .. المستقبل .. إرسمه أحلي بايديك
دي مصر .. كلنا إنسان .. بنفرح و بنزعل وبنلعب و بنحب.. نقوم نحاسب إنسان محدش حاول يحاسبه غير حكمكم عليه لمجرد إنه فرح في صورة ولعب مع الشعب؟ :))
العسكري دا مغلطش أنه شاركنا فرحتنا بالعكس دا فرح قلوب ملايين و كلنا واجب علينا نشكره ونشكر كل مواطن و فرد عسكري و شرطي بيعرف إزاي يسعد اللي حواليه بحاجة بسيطة زي دي

الصُور الجَماعيّه .. بهًآ شَخصٌ مفقــوُد . . . ! دآئمُآ يتنآزَل عنً مكآنٌـهٌ ...
لـ ِ يلتـقٍط ألصُورٍة . .
شكراً .. صلاح سليم

ويبقي سؤال .. أترك إجابته لكٌم
ده عسكري بسيط وبيتعامل بحسن نية مع الشعب لمصلحة مين تتقلب الدنيا فوق دماغه ويبقي التركيز كله انه لابس ميري ؟
أنا شايف إن الصورة بتعبر عن شجاعة الجندي المصري وبجد العسكري شكله يفرح

وهو ماسك بندقيته بكل شجاعة وشموخ ..


شكراً للقوات المسلحة و الشرطة المحترمة والشعب أساس الجيش والشرطة أخواتنا

شكرأً للجندي الجميل اللي إتصورنا معاه وأنت في أمان الله

يعني كلنا مصر .. شكراً للمصريين وحبايبنا في كل مكان


وكل سنه وأنتم ومصر والناس الطيبة كلها بخير

MonTana Master Of Love

14 Responses so far.

  1. كل سنه وانت طيب يامونتى
    انا شايفه ان الموضوع بسيط
    واللى يكبره يبقى انسان تافه

  2. كل سنه وانتي طيبة يا دودو .. انا بقالي كدا 15 ساعه متواصل قاعد علي الجهاز عشان اتكلم لأن الناس بتحكم وخلاص .. كل واحد بيسمع علي مزاجه .. بحيت أشير كل الصور عشان الناس تطمن وتعرف ان عادي اننا نتصور مع عسكري وفي أمثله لكدا كتير بعد الثورة .. بدام منتهكناش شرعية بلدنا او ضرناها في حاجه .. العيد فرحة و يارب يحفظ مصر ويحفظ كل المصريين

  3. هههههههه
    والله يا مونتي انت انسان جميل وكل اصدقائك زيك ما هو الجميل مايصاحبش الا جميل
    نفسي فعلا نشوف الروح بتاعتكم دي تملا مصر واله مكنش بقي حالنا كده
    كل سنة وانت طيب

  4. ويكا says:

    ايه ده هو الراجل ده فعلا حصله حاجه؟؟؟؟

  5. السلام عليكم صديقى
    بداية كل عام انت بخير
    برغم من فرحى جدا بنجاح فكرتكم واحتفاليتكم الا انه سائنى كثيرا ما كرت مما حدث مع الجندى المرح وللاسف اعتدنا ان نتعامل مع ظاهر الامور
    نتغير وتتقدم بلادنا عندما نرى جوهر الاشياء والمغزى منها
    بوست وصور فوق الرائعة صديقى
    دومت بود

  6. على فكره انا واحد من الناس قولت لو حد من الجيش شاف صوره العسكري ده ممكن يتبهدل .... بس انا مبسوط جدا انك وضحت الصوره دى ...وانا برده واحد من الناس كان نفسي أبقا موجود فى اليوم ده بس ظروفي هى اللى خلتنى أسافر قبل العيد تسلم إيدك وكل سنه وانتو طيبين ويارب يعطيكوا على أد نيتكوا ... محمد العسيلى

  7. موضوع دسم جدا
    ومجهودك فيه واضح

    بالتوفيق دائما

  8. كل سنة وانت طيب
    مدونتك فيها روح جميلة
    انا كنت سعيدة جدا وانا بشوف الصور بجد
    تحياتى

  9. كل سنه وانت طيب يا مونتي
    والجندي المصري خير اجناد الارض واحنا واثقين في كدا
    اما حملة التشكيك اللي ناس كتيره رافعاه على بعض وعلى الجيش وعلى الشرطه وعلى القضاه وعلى كل الناس
    يارب الهدوء والاستقرار لكل المصريين والوطن العربي
    اشكرك لاني حاسس اني شاركتكم فرحتكم بالاحتفال الجميل ده بالعيد

  10. السلام عليكم أخِي .,
    وكل عآم وانتم جميعكُم ووطنكُم بِخير .,
    أفكآر جَميلهً ليظهُر عِيدكم بأجمل مآ يكونْ ولتدخلوآ الفَرحة في قلوب الصِغآر

    ربِي يسعِدكمْ

    دمتم بخير

  11. مساء الورد مونتي
    حلوة كتير مدونتك
    بجد عجبتني اوووي
    برغم اني مش بحب الصور الكتير لانها بتشتتني
    بس بجد عجبتني اووي لانها ف مواقعها تماما
    احييك بشده

  12. Ramy says:

    كل سنة و أنت طيب

    يا محمد

    عيد أضحى سعيد عليك

    و على كل الأسرة

  13. كل سنه وكل لحظة وانتم اغلي واعز الناس انا اسف بتأخر عليكم بسمش ممكن انساكم ابدا ابدا يا اغلي الناس كل سنه وانتم طيبين ورمضان كريم و هرد عليكم واحد واحد بس سامحوني علي التاخير
    Montana

  14. السلام عليكم
    ازيك يا مونتى عامل ايه ياراجل مش حد بيشوفك يعنى ولا بتسأل ....وشكلك مش بتنزل حاجة جديدة .....معلش كنت محتاجة رايك فى البوست دا عشان المسابقة بتاعت كتاب 100 تدوينة ممكن اعرف رايك قريب اووووى عاوزة اتاكد انها تصلح للمسابقة .

    shemo