Saturday, 2 July 2011

اسئل عن اللي غايب هنا .. اطمن علي اللي غايب هنا



في ناس بيعدوا في حياتنا وبيرحلوا غصب عننا




بنعيشهم اوي .. بنحسهم وبنعيش تفاصيلهم وبنعتبرهم جزء مننا





في اللي بيسيب معاه ذكري حلوه و في ال بيرحل من غير سابق انذار وبيترك وراه الألم .. يفكرنا





و بنعيش واحنا مستغربين .. ايه ال بيحصلنا؟





القدر ساعات بيحكم علينا بالفراق بعد حاجات معملنلهاش حساب وبنستسلملها وبنبقي عاجزين عن التعبير









وبنسرح مع الاحساس .. ونعيد ذكرياتنا





" بياخدنا حنين .. ويجيبنا حنين أيام بتعدي وكل يوم بنشوف كتير"





بتغيب اوقات عن بالنا حاجات .. وحاجات في قلوبنا بنفتكرها بكل خير





بياخدنا حنين ويجيبنا حنين .. أيام بتعدي وكل يوم بنشوف كتير .. بتغيب اوقات عن بالنا حاجات وحاجات في قلوبنا بنفتكرها بكل خير





نااااس .. بنقابل ناس .. ونفارق ناس .. ومش قادرين ننسي اللي كان





مين .. في الدنيا دي مين ؟





محلمش في يوم لو ترجع بيه أيام زماااان





*** *** ***









" إنما الناس عطور .. فكلما شاهدت زجاجة عطر رأيت فيها انسانا لان البشر يشبهون تمامأ انواع العطور وهناك انواع من العطور تبقي معك أياماً وتعيدك أحياناً الي أشياء نسيتها .. فبعض الأنواع يعيد لك صور الماضي ويجسدها في عينيك





في منتدي جيفنز منتدانا العريق قبل ما نعرف الفيس بوك و المواقع الاجتماعية الاوسع انتشاراً .. كنت عامل توبيك اسمه





اسئل عن اللي غايب هنال واطمن علي اللي غايب








.. حسيت وقتها بوجود ناس لها تأثير واضح في المنتدي وبتختفي و ناس في حياتي بيعدي الوقت من غير ما نحس وبمطمنش عليهم .. قررت اعمل التوبيك دا و الحمدلله .. إطمنت علي ناس كتيرة بحبها و كل اصحابي كانوا بيدخلوا يردوا فيه ويسالوا عن اللي غايب في المنتدي ويطمنوا عليه





واد ايه كانت بتبقي فرحتنا لما نلاقي حد راجع مفاجأه بعد غياب





ودلوقتي وانا نفسي اعمل نوت ومش قادر الاقي افكاري ولا وقتي ولا حتي الموود ال كان بيساعدني اكتب .. حبيت اعمل النوت دا من جديد .. و مع الوقت هيوسع فكرته و يتعمل جروب نسأل فيه عن كل ال غايب .. نصل ارحامنا فيه لحد ممكن ميكونش سامعنا والاقدار بعدتنا لأي سبب .. نوصل صحابنا ببعض و .. نطمن علي بعض .. و نقول لل بنحبهم اننا بنحبهم بجد .. وال يقدر يعيش وهو جارح قلب رقيق وميصالحوش وميطمنش عليه يبقي ميستاهلش الحب ولا هيقدر يكمل حياته بطبيعته









ومن هنا احب اسئل عن .. أصحاب سافروا و بتمنالهم يرجعوا بالسلامه يارب





عن قرايب كانوا ليهم دور في حياتي وبعدوا ومبقوش يطمنوني عليهم





عن حب عابر .. فات قدام عينيا و استنيته كتير و مارجعش





عن قلب اداني حب بضمير و قلب اداني حب وابتسامه و قلب اداني الأمان واختفي مع زحمة الدنيا





هسأل عن ناس ممكن منحسش بيها غير في وجودهم وبس





ممكن فيهم حد مبقاش في حياتي بارادته و ممكن فيهم حد ميفرقش معاه وبعد بمزاجه وخلاص .. !!





بسأل عن ناس أثرت في حياتي و ليهم دور وعشره و مواقف معايا ..





وواجب اطمن عليهم واقولهم فاكركم ومش ناسيكم









الورود دي عشانكم .. بريد هيوصلكم لحد قلوبكم .. عايش مش عايش هتوصلكم .. عليها كلمتين أنت بخير؟





يارب تكونوا بخير





فين أحمد سووو؟ اختفاء مفاجيء





१२-2010





فين منونه درويش





२-2011





فين صحاب كتير بيختفوا من غير ما نحس





فين الناس ال كانت بتقف قدام مرايتها وتحكي و لما خلصت حكايتها سابت المرايه في الظلام من غير كلام بقسوة انتزاع الطفل من رحم أمه





فين نجوم المدونات .. اللي كنت متابعها من زمان؟





كنت بعيش حالة جميلة و منفردة مع نصايح دوبا وفيجن ورحاب بسام وقصاقيص مشاعر وفبركه واشرف توفيق أخف دم





و حكايات كلبوزه لكن سمباتيك





فين قصة الفيلم ال كنت بسمعها مع القمر كل يوم تلات الساعه 12 .. بصوت الرائعه ايناس جوهر .. و فين جوابات الصحاب و اهدائاتهم ع الورق !!





كل ال بحبهم وبيبعدوا بمزاجهم ليه؟؟





.. هسيبها للربلاي









وتصبحوا علي خير





تحديث





*





اصعب حاجه في الدنيا .. لما تعيش جوه حد أوي .. يفتح لك شبابيك عالمه و يديك أمان .. تكون اخوه وصديقه و تحافظ عليه





من كل حاجه .. كل حاجه حتي من نفسك





تشوف الدنيا حلوه في وجوده وبيهون عليك مفاجئات الحياه كل شوية









وفجأه تغمض عينيك وتفتح تلاقيه اختفي من عندك.. مفاجئه مش كدا !!





.. من غير مقدمات .. من غير سبب مقنع .. وكأنك خلاص مبقاش ليك وجود في الدنيا و لا فاكر ليك اي ذكريات





لسه في مفاجئات ..





.. عشان كدا .. لما نحب بعض اوي .. بلاش نفترق من غير وداع ونفتكر التلات حاجات دول .. رقي .. اخلاق .. وفاء









يارب .. كل ما نقرب .. ثبتنا





ولما نكسب حد .. منغمضش عيونا ونفتح نلاقيه سراب





يارب .. تبدل الدمعه ابتسامه و نشوفها ضحكه ع الوشوش





اللهم امين يارب

6 Responses so far.

  1. Ramy says:

    أزيك يا محمد

    بأمانة فيك الخير

    تصدق بايه

    على بالى اكتب حاجة زى كده

    بس الصراحة عن منونا
    منى درويش

    أصل احمد سوو بتابعه لما بأدخل الفيس
    بس منى درويش قفلت كل المدونات بتاعتها
    وكمان مبدخلش فيس

    فكنت عاوز اعمل عنها بوست اهداء ليها
    بس كنت مكسوف الصراحة

    (:

    شوفت الخيبة يا عم

  2. رامي دايما انت صاحب واجب في كل حاجه ومش ناسي تعبك معايا في رمضان ومع منونه كمان لما كنا بنفطر سوا يوم ابو الريش
    انت حد جميل اوي و يارب ينولك كل ال خير الي في قلبي ليك
    انت كدا وصلتلها البوست لان هي اكيد متابعه .. انت عارف انها هي ال كانت عملالي قالب المدونة ومن يوم ما غيرته مش عارف اظبطه زي ما هي كانت ظبطاهولي .. كانت عاملاهولي يوم عيد ميلادي هديه جميله عمري ما انساها
    البوست دا عامله من زمان و طبعا مش مرتبه بالروح ال كانت عاملها في منتدي جيفنز ايام زمان .. و لما كنت بسال علي سو كان في شهر 1 -2011
    ايام ما اختفي فجاه والحمدلله رجع
    وكمان كنت بسال فيه علي ساره درويش في الفترة دي .. و لما لاقيت غياب منونه طول قولت لازم انزل بالبوست دا و فيه تحديثات نسال فيها عن كل ال بنحبهم وغايبين عننا
    انت مش خايب ومش كسوف و رسالتك كدا وصلت و لو عملتها بوست بروحك هتبقي احلي واحلي كمان
    :)) ربنا يرجع كل الغايبين بالسلامه ويكرمك يارب يا رامي

  3. صباحك غاردينيا
    وماأجمل تلك المشاعر التي قرأتها هنا تمنيت حقاً أن أكون أسم يذكره من يعرفه بـ الخير وحين يغيب يسأل عنه الجميع فليس أجمل من محبة الناس وقرب الأصحاب ..وليس أجمل من إمتلاك قلوب نقيه صادقة لاتعرف الخذلان ولا النسيان ويبقى الرقي والوفاء والاخلاق فجميعنا أخوة "
    ؛؛
    ؛
    لروحك عبق الغاردينيا
    كانت هنا
    reemaas

  4. أنسان راقي بكل معنى الكلمة
    ومشاعر كلها رقة ونبل
    ربنا يحفظك يا رب ويوفقك
    يا بخت الي بحبوك واهلك واصحابك فيك

  5. Baskouta says:

    منونة وحشتنا كلنا
    لان الفراغ اللي سابته لما مشيت فراغ محدش تاني يقدر يملاه
    في ناس لما بتمشى بتاخد معاها حتة من قلبك فتسيبك طول الوقت مستني يرجع ويكملك

    :(
    ولما تحب تدور هتلاقي انك بتدور على حتة منك

    يارب طبطب عليها على قد حبنا ليها

  6. Carmen says:

    مشاعر رائعة باسلوب راق تسلم ايدك تحياتي