Saturday, 14 February 2009

حب ... بلا فلانتين!!


كـل يـوم وانـتـم بخـيـر ... بوكيه ورد الاسم الجديد لمدونتي ... عجبني اوي احساس اسم مدونة كل مدون قابلته في لقاء المدونين الخميس ال فات في مكتبة
ع المشايهBook & pens
عشان كدا وبكل حب لاقيت ان بوكيه ورد هو الاسم المناسب لمدونتي فبوكيه الورد له علاقات كتيره في حياتي ... و نفسي بجد اعمل موضوع كبير عن الورد و فوايده و عوامله النفسية علي كل ال بيشوفه ويستخدمه كوسيله للتعبير عن مشاعر الحب القويه
يعود اليوم ذكري جديده بيحتفل بيها كل العالم بنفس المشاعر ونفس طريقة التعبير عن الحب
انها ذكري اعدام القديس " فلانتين " ال تم اعدامه بامر من الامبراطور الروماني كلاديوس في 14-2-270 م
عقوبه علي رفضه لاوامر الامبراطور بعدم عقد قران بين أي رجل وأمراه لاعتقاد الامبراطور ان زواج الجنود بيضعف منهم و من ادائهم و اهتماهم بالدفاع عن بلدهم في الحرب ... علي اساس ان كل واحد هيفكر في مراته وعياله فمش هيحارب و هيروح يموت جمبهم ... هو كان بيفكر كدا!!

والقديس فلانتين كان بيعقد قران الراغبين في الزواج سرا في الكنيسة !!
ودفع حياته ( كما يزعمون ) تمن لانتصار حق الحياه والحريه و السعاده والحب بين الناس وبين كل ال بيحبوا بعض وكل ال حابين انهم ياسسوا حياه مبنيه علي الحب ...
وعلي هذا جعل يوم استشهاد القديس فلانتين عيد وطني عند الرومان
ولظروف معرفهاش انتشر العيد المزعوم لحد ما دخل مصر ... وبدء المصريين يحتفلوا بيه من حوالي 15 سنه ومكفهمش عيد واحد لا دا كمان بنحتفل بيه مرتين في السنه عشان نفكر الناس تحب كل ما تبدأ تنسي و تجري ورا همومها وانتشر الاحتفال بيوم الحب كعيدا يوحد المصريين لاول مره في يوم واحد لا يرتبط بالاديان السماوية
يجمع بين المسلم والمسيحي لانه يحث علي الحب

ونسينا ان
اعيادنا الشرعيه التي وهبنا الله اياها هي اساس الحب والتواصل بين الاهل والاصدقاء والترابط بين الاديان

جميل ... جميل ان نوحد علي مبدأ الحب ... لان بانتشار الحب لن نجد حروب ولا مشاكل ولا احزاب
ولكن تحت اي مسمي نحتفل بالحب؟

وعلي حد علمي وليس اكيدا ان صاحب فكرة الاحتفال بعيد الحب هو نفس صاحب فكرة الاحتفال بعيد الام في مصر ... لانها كانت برضه فكره غربيه واتنقلتنا ... جميل اننا نجد يوم للتعبير عن حبنا القوي لامهاتنا بس ميكونش بسبب واحده زي الفلانتين ونقتدي بيها ودا ال انا عاوز اتكلم عنه

عــيـــد الـحـــب

اللي بيقولوا عليه عيد العشاق

اكتر المستفيدين منه محلات الهدايا والورد ودي حاجه جميله بدام مش بيشتروا حاجه غلط و تلاقي الناس عماله تشتري قلوب حمرا و ورد احمر و بلالين هيليوم وسبحان الله تلاقي الواحد بيصرف اد كده في اليوم دا علي الهدايا ورسايل الموبايل المليانه حب وينسي اهم حاجه في الحب يعني لو كان اتصدق بشويه من الفلوس دي لحد فقير مش دا حب؟!!

طبعا معظم ال بيحتفل باليوم دا هما الشباب ال علي علاقه صداقه فقط ولا تربطهم علاقه شرعية او ع الاقل خطوبة

فتلاقي في الجامعه من الصبح الهدايا رايحه جايه وكانه معرض للهدايا بجميع اشكالها ... وكمان في وسط الحرم الجامعي تلاقي ال ماسك ايد حبيبته و هي مسهمه اوي بلا حياء وسايباله نفسها خالص اصلها بتحبه

بس متعرفش انه لو قبل دا عليها واتجوزها يبقي انسان ديووووس و مبيخافش عليها ولا بيحبها اكتر من انه بيلمس ايد وبيحس حاجه حلوه مع واحده حلوه مش بتاعته لوحده

وباليل لما تطلع ع المشايه وتلف وتلاقي اللبس الصواريخي والالوان الحمرا و البنات مبسوطه اوي بالمعاكسات اليوم دا ... لازم يتبسطوا دا اليوم الفري و عشان الفلانتين ميزعلش في قبره منهم ... اكيد في ال ممكن يحيي ذكراه في ليله زي دي بزواج عرفي زي ما بيحصل كتيرمن شباب الجامعات المعروفه بلا ذكر اسمها

ال بيجاهد في سبيل الله ويموت بيتسمي شهيد و هو ودرجته عند ربنا سبحانه وتعالي لكن ال يموت عشان واحده ست يتسمي شهيد ليه؟!

الدنيا بتلف وبتعيد اكذوبة روميو وجوليت بس في صورة الفلانتين ... طيب هما ليه صحيح معملوش عيد لانتحار اتنين ماتوا علي الكفر واحنا بناخد منهم القدوه و ضرب المثل في الحب ؟

انا مش عايز انافق احنا كنا ومازلنا نحتفل بهذا اليوم و اكيد كل واحد بيحتفل بيه بنيته ... المهم ان اليوم دا منحتفلش بيه عشان الفلانتين !!

الحب دا اسمي مشاعر في الوجود ومن غيره طبعا ما نقدرش نعيش انا خاصة ما اقدرش اعيش من غير ما احب الحب بمختلف انواعه خاصة الحب اياه دة ;)
المهم هو اننانحب صح ايه رايكوا في اننا كمان نحب بطريقة ما تغضبش ربنا سبحانه وتعالى؟
كمان شرعيا نقدر نحتفل بالحب النهاردة وبكرة وكل وقت دينا الاسلامي بيامرنا بكدة نتهادى ونتحاب كمان
لكن ما ينفعش نقول لبعض هابي فالنتين داي ده شرعيا حرام لكن ممكن نقول كل حب وانت بخيرايه رايكم؟
جميل اننا نخلي كل يوم لينا عيد للحب ... ولكن بلا فلانتين
ولكلامي بقية ...

8 Responses so far.

  1. eblees69 says:

    ياسلام يامونتى كلامك معبر اوى اوى موضوع هايل بمعنى الكلمة

  2. السلام عليكم و رحمة الله


    أولا بجد أسعدتنى زيارتك
    و يارب مش تكون الاخيرة


    ثانيا موضوعك رائع
    و كلامك كله صح

    صحيح الفلانتين نفسه حرام
    لكن مش معناه اننا بنحرم الحب
    لا دا شعور جميل
    و فعلا ديننا الجميل حثنا عليه
    و فى كل يوم
    مش يوم واحد بس



    ملحوظة صغننونة لو تسمح : ديوث بالثاء مش بالسين




    و دمت بود

  3. والله معاك حق دا حتي لما يتصدقوا ربنا يربط بينهم اكتر ومش هيعملوا حاجه غلط

    ميرسي لكلامك اللي قلته ليا

    واتمني مش تكون اخر زياره وتزور عالم مولان كمان

    عشان عالم مولان هو المدونه الرئيسيه

    تحياتي

  4. كيارا .. بعاتب نفسي ازاي كل الوقت دا مردتش عليكي
    بس مبسوط ان لاقيت حاجه ارد بيها علي مبدعة عالم مولان الجميل
    كلامك جميل وحقيقي و دايما بزور عالم مولان وبسشتمتع بيه و هيكون زياراتي ليهاكتر بعد تغيير التاريخ ببطولاتكم شباب 25
    :)

  5. وعليكم السلام ورؤحمة الله وبركاته
    Soul.o0o.Whisper
    أولا اسف جدا جدا جدا جدا جدا علي التأخير
    و أحب النهارده اقولكم كل سنه وانتم طيسبية بمناسبة المولد النبوي الشريف ومستعد اصالحكم بفسدقيه وعين جملة وبندقية و جوزية
    وحقيقي انا ال سعيد واتمني متكونش دي الزياره الاخيره
    أشكرك علي اطراءك ويارب كل يوم يكون يوم حب لينا بحبنا لبعض يا مصرييين ويا كل الاحبه في الله
    اشكرك علي الملحوظة وتشرفت بحضرتك جدا
    :)

  6. ميرسي يا عبده يا جميل و يارب دايما تكون بخير ونبقي ايد واحده زي ما كانوا ف التحرير

  7. sony2000 says:

    احسن انه السنادي جاي مع المولد النبوي الشريف
    بكدا ماحدش هينطق:)

  8. انا مبحبش اليوم ده

    بحس انه بيبخس الحب حقه

    بيلخص حب السنة كله في يومين

    ده غير ان الدنيا بتقلب احمر في احمر وانا بكره اللون الاحمر
    :)

    برغم ان اخر براجراف عجبني بس برضه مبحبش اليوم ده