لا لستار اكاديمي - كلاكيت تاني مره

بسم الله الرحمن الرحيم

---

من سنه تقريبا كتبت عن موضوع لا لستار اكاديمي لا للمسخره وقلة الحياء ... والحمدلله كل مكان اتكلمت فيه عنه لاقيت فيه ايجابيه من الناس ال قرت الموضوع وفهمت وجهة نظري في كلامي عن ضرورة مقاطعة البرنامج الهادم دا

و عدت سنه و بدأ جيل جديد من البرنامج اللبناني الشهير ورجعت الناس تاني تتجمع قدام المفسديون بوهمهم بالاستمتاع بالبرنامج الفاسد

وبيظهر فارس جديد بوسامته وروشنته وستايله الجامد ... وال بيقدر يمحي اثار الفارس القديم في البرومو ال قبله!!

تخيلوا لما واحد يكون مرتبط ببنت وبيحبها وراسملها صورة الحبيبه المخلصه والبرنسيسه ال هتعيشه امير في مملكة الحب والغرام هو لوحده كزوجة مميزه و ام تقدر تربي ولاده صح وتقدر تتحمل مسئوليتهم في وجوده وعدم وجوده و تقدر تبني جواهم معاني الحب الحقيقي ... تخيلوا الصوره دي ممكن تبقي شكلها ازاي لما بكل بساطه حبيبته تقوله تعرف انا بمووووت في المطرب كذا ال في ستار اكاديمي ايوه هو دا ال بيبوس البنت الفلانيه دا دا انا بموت فيه يا حبيبي ... والمصيبه بقي انه يضحك ويقولها بكل بساطه برضه زوقك حلو يا حبيبتي تعرفي انا كمان بحبه اوي و بحب البنت الفلانيه ... تقوم بقي تخبط علي كتفه وتقوله عيب هو انا مش ماليه عينك ولا ايه؟!

هو الحب ايه ؟! غير قلبين بيتوافقوا مع بعض و احساس مشترك بيجمع بينهم دقات قلب و نظرة عين و خوف و فرحه و ضمه تدي الامان جواهم .. ازاي حد يحب حد ويشاركه الحب دا حد تالت شايفه بعينه بيعصي ربنا وبيختلي ببنت قدام الناس ازاي نقول بنحبهم؟! ممكن نتفرج عليهم و نغلط و نشوفهم مره واتنين بس اكيد لما نحب

لازم نحب حد واحد بس !!

الحب بطبيعته متقسم قسمه ونصيب دا الطبيعي واحد بيحب واحده بيشوفها اميرته وبيحاول يعمل كل حاجه حلوه عشان يرضيها .. وهي بتشوفه اميرها ال بيملكها لوحده وبتحافظ علي امتلاكه ليها بوفائها و رومانسيتها و ابتسامتها و اكلتها الحلوه لما يكون راجع م الشغل تعبان ومحتاج ياكل من ايديها وبايدها .. دا الطبيعي والقسمه العادله لكل واحد راضي بقسمته ونصيبه وحافظ عليهم ومبصش لحاجه مش بتاعته !!

والحب دا امانه لازم نحافظ عليها .. ازاي اقدر اختار بنت احبها وهي النهارده بتحب المطرب الفلاني بتاع الموسم دا و سبحان الله بتقدر تنساه بعد الحب الجارف مع اول ظهور للمطرب الجديد في الموسم الجديد وبرضه بتفضل تقول بحبه بحبه بطريقه لو عاشتها مع انسان بتحبه بجد .. ميكفيهوش بوكيهات الدنيا كلها عشان يعبر بيهم عن حبه ليها

معجبه من متابعين ستار اكاديمي النهارده بتقول انا بحبك وبعشقك يا كذا

و معجبه تانيه عامله النك نيم بتاعها عاشقتك الي الابد ... يا كذا

و نفس ال كانت بتعشق كذا الموسم الجديد بتعشق كذا تاني غيره !! وهي عارفه كويس ان في عشاق كتير غيرها بيعشقوه وهما شايفينه بيترمي في احضان البنات في الحرام مافيش وصف تاني ممكن اوصف بيه المنظر المشئمز دا

ومستغرب بجد ان عشان واحد مبيحضنش كتير و مبيبوسش كتير .. يتقال عليه بكل بساطه دا انسان محترم ومتربي

في يوم واحنا ع المشايه عندنا في المنصوره وكعادتنا بنلف بالعربيه ... كان يوم خميس

لاقينا عربيه ملاكي مليانه بنات بالهبل ...

وبيهيصوا في العربية و بيهتفوا سوا

هاني ... هاني ... هاني

وكان يومها هاني مطلعش نو ميني

احساس جميل ان في حد يحب حد ويحسه ويشجعه انه يستمر في طريقه للنجاح

و فيها ايه لما نخلي ولادنا ينزلوا ويرقصوا ويهيصوا ويهنوا بعض بالقبلات في النوادي والجامعات ما احنا برضه ماقلناش عيب انكم تشجعوا حد بيعمل كدا تحت اسم الفن !!

في الوقت ال كانوا بيهيصوا فيه في نفس واحد عشان نجاح واحد ... كان في فئة سلبية بتتعدي علي اسم

رسول الله سيدنا محمد صلي الله عليه وسلم

ليه مكناش نقف كلنا ونرفع ايدينا للسما ونقول يارب انتقم منهم وانصر رسولنا الكريم

اليهود الله لا يمسيهم بالخير ابدا يارب ... عملوا حرب علي لبنان ...وقتلوا الاطفال الابرياء ... ومكنش عندهم ادني رحمه لا بطفل ولا عجوز ولا امراه ولا اي حد ... واول ما ضربوا ابتدوا بالمسلمين والاماكن ال فيها الناس المسلمه ...يا تري ليه مضربوش ليه المكان ال فيه ستار اكاديمي ؟!!

كل ال كنت بشوفه اطفال و شيوخ ونساء بيموتوا ظلم ... في الوقت ال كانت بتطلع فيه مذيعه بلبس متحرر علي قناة لبنانية تشيد بمشاعر الحزن والاسي .. وتحيي المطرب الصامد علي اخر اغانيه

ايامها مكنتش دخلت الجيش ومع ذلك كان نفسي اروح هناك واخد صحابي ونحاول نشارك باي حاجه في الحرب

والحمدلله .. الحرب انتهت و بدأوا في اعمار لبنان .. و ازالة اثار العدوان الوحشي

وفجاه .. بلاقي حلم حلمته بيتحقق ومعاه كابوس جديد بموسم جديد لستار اكاديمي

في الوقت ال ممكن كنا نتبرع بيه عشان نلاقي حياه جديده في بلد بنحبها

بيرجع تاني الناس تتجمع قدام بنات وشباب ميعرفوش بعض وبيتقابلوا لاول مره في مكان بيحللهم القبلات والاحضان .. وكمان بيطلبوا من الناس التصويت مش عليهم لا ليهم يعني ممكن حد بيحب المطرب الفلاني يدفع الافات في اليوم عشان بس ينجحه .. اوك اتفرج مافيش مشكله .. اوك اتفرج عشان تعرف تخاف علي ولادك انهم يتاثروا ببرنامج زي دا لكن لما تتفرج و تدفع فلوسك عشان تنجح مطرب او مطربه لا ليهم صوت ولا احساس يبقي

لازم اتكلم ولازم اخاف من بكره ... لما اشوف حاجه غلط وكل ال حواليا محللها و شايفها صح

:(

طيب هو مين ال سمح بالبرنامج دا انه يتعرض في لبنان ... ونسي بسرعه اطفالها واهلها ال ماتوا ظلم فيها وكل

ال همه الفساد والفلوس ويلهي الناس في حاجه بتهدم مبتبنيش

مش قادر اتصور ازاي اب يسمح لبنته تقدم في برنامج زي دا ؟

ويروح ويحضن بنته وهي كاسيه عاريه ويدمع كانه بيحضن بنته ال اخترعت اختراع هيفيد الدنيا ...ويرفع راسه اوي وهو فخور ببنته ذات الصوت ال مش حنين والنضاره هتقع من علي عينه من كتر ما شد راسه متعاليا متفاخرا بهديته للامه البشريه ال طربتهم ورقصتهم ونستهم ضحايا الحرب ... وبما انه اب مش ديوث لا سمح الله

وهو نازل من علي الاستيدج بيعمل دوره الابوي ال يشهد له بابويته المتفانيه وبيقول لكل الولاد المحترمين في الاكاديميه والبنات ال زي الورد ال قاعدين بجيبات نص كم

يا ولاد مش هوصيكم علي بنتي دي زي اختكم خلوا بالكوا منها

وطبعا بما انها اختهم ... عادي بقي يبوسوها و يخلوا بالهم اوي

والناس تضحك والبنات تسقف والشباب يحضنوا

والدموع تنزل من الموقف المؤثر دا

في اب بالشكل دا ؟

بيخاف علي بنته اوي كدا ... لا بجد انت اب مش ديوث ابدا وعرفت ازاي تخلي بنتك سبب انك تدخل الجنه

!!

كان ومازال .. بيشتغل في بيوتنا كل موسم .. وكل مره بييجي فارس احلام جديد بيشغل عقل بنات و عادي جدا لما بنت تقول قدام باباها ومامتها بكل الحب انا بموت في فلان الفلاني ... هو فين دا ؟!!ايوه هو دا ال بتشاور عليه ال قاعد بيملس علي شعر النجمه الفلانيه هناك دي !!
وبنرجع نقول هي البنات بقت بتلبس كدا ليه وبقت فري في كلامهم كدا ليه ؟بنرجع نعاتب و نلوم و احنا مسستسلمين شباب وبنات لافكار مسمومه بيحقنوهالنا من غير ما نحس
الموسم الجديد ال البنات بتفتخر فيه بالنجم ابن بلدي ال من المنصوره ... وال منهم دخل وعلق ع الفيس بوك وقال رفعت راسنا يا سراج يا بن بلدنا ... مع احترامي ان لو كان سراج هو الشخص ال نقذ روحين برضه من يومين مكنش اتعمله الضجه دي كلها .. من يومين بالصدفه لاقيته شغال قلت اشوفه ... واتفرج ممكن استفيد وبالصدفه لاقيت بنت بيقولوا مصريه ( باباها مصري نوص نوص ) ومامتها مش عارف منين !!و بيهزروا معاها و مشاعر الحب هتطق من عينيهم وواحده لاقيتها بتعيط و زعلانه اوي عشان زميليتها قالتلها لفظ مش كويس بتقولها انتي مش متربيه اتخضيت وقولت اعرف ليه تقول لزميلتها كدا في الاكاديميه ؟!!والحقيقه كانت في انها كانت بتوريها رقصها وعايزاها وتقول رايها في فنها وهز وسطهاو شدوا في الكلام بعدها فقالتلها انتي مش متربيه والبنت زعلت اوي وقالت انها متربيه احسن تربيه .. وباباها ومامتها واخواتها وكل العيله المتربيه قاعدين دلوقتي بيشوفوها وهي بتدرس وبترقص يا عيني وهاريه نفسها مذاكره لحد الصبح عشان تثبتلهم انها اد ثقتهم فيها و مش هتبقي نو ميني ابدا ابدا ... ونعم التربيه :)وعادي بقي ... خلونا نتفرج ع التربيه الصح ... ونفرج ولادنا عليها كويس .. عشان برضه منعرفش نعاتبهم لما نلاقيهم بيقلدوهم ما عادي ما احنا كلنا بنتفرج عليهم وهما بيعملوا كدا ومن غير ما نخجل من ال بنشوفه فيهم وعادي بقي لما اشوف بنات وولاد قدام بيوتنا وفي جميع الاعمار واقفين و بيتضحكوا علي بعض و مش هاممهم ان في حد باصص عليهم و مش عاجبه منظرهم !!هنفضل لحد امتي نوافق عليه ونشغله في بيوتنا وقدام ولادنا وندعمه و نصوت لهم ونصوت عليهم وفي مريض سرطان لوحده ويتيم بيبكي ومحدش حاسه دول موجودين وعايشين وسطنا في حياتنا محتاجين حد يحسهم و يبتسملهم و يمد ايده ليهم ... بحب عشان يلاقوا فينا امل يعيشوا بيه
دا ال بيساعد علي انه ينشر حسنه واحده بتبقي في ميزان حسناته بعدد كل ال هياخد الحسنه دي ليوم الدين حتي بعد ما يموت يبقي ال يتبرع بسيئه لبرنامج سيء بيساعد علي هدم الشباب وقلة حياء البنات دا يتعمل فيه ايه دنيا واخره ؟؟وبرضه هيفضل ياخد سيئات عن كل واحد اخد السيئه دي بسببه لحد ما يموت وحتي بعد ما يموت وليوم الديناحنا محتاجين حسنات كتيره عشان يارب يارب ندخل الجنه ومن غير حساب هو دا الاحساس ال يستاهل اننا ندمع عشانه ..ونقول يارب مش ندمع عشان معرفش مين طلع نو ميني و المعجبين يا عيني كانت بيموتوا فيه !!ومن مكاني هذا اقول اللهم بلغت اللهم فاشهد

ويارب اهديني

.. ويارب يا رب استرها علي بنات المسلمين ويارب ساعدنا اننا نشوف الدنيا صح بعيد عن برامج الفساد ..امين