كل سنه وانتم طيبين ..
وانتم منورين الدنيا ومنورين حياتي بوجودكم و اضافاتكم الجميله في حياتي ..
وانتم اغلي ناس ربنا بعتهملي في حياتي عشان اعرف ان الدنيا فيها حاجات حلوة ممكن تصبرنا فيها علي كل حاجه بنشوفها ..
زي كل سنه بستني منكم التهاني اللي بتملي بروفايلي وبشوف فيها روحكم الحلوة اهلي واصحابي و المدونين و معارفي ..
و السنة دي كان نفسي اهنيكم قبل اي حد بس موبايلي الاندرويد رحل بلا عوده ..
و اتغير السنه دي حاجات كتير في حياتي ..
كل اول يوم في رمضان من كل سنه كنا متعودين عيلتنا كلها اعمامي و اولادهم وعماتي واولادهم في بيتنا علي شرف استضافة والدي الغالي الحاج / متولي ( الله يرحمه ) و جدتي الله يرحمها ملكة بيتنا اللي كان الكل بيتجمع علي حسها و هي بتدعيلنا و بتفرق علينا الاكل ساعة الفطار ..
وزي كل سنه اتمنيت اروح لعمي امد له ايدي في المسجد واقوله كفايه بقي تعالي نورنا ونصل رحمنا من جديد ونتلم علي سفره واحده .. واتصلت بيه عشان اعزمه بس .. محصلش نصيب ان اعرف اكلمه ..
السنه دي اتلمينا عند عمي الغالي / ناصف .. وكان معانا القمر اللي نور عيليتنا
( عبدالرحمن حسام ) ابن الورده اللي ربنا اختارها ترافقه وهي بتولده الشهيده / هند ..
فطرنا كلنا علي سفرة واحده وماقطعناش العاده اللي بنعملها كل سنه عشان عارفين انهم هيكونو مبسوطين وهما في الجنه وشايفينا بنسئل علي بعض و بنحب بعض ..
حتي المسافرين مننا اختي واخويا .. كلمونا ع الفطار وقالولنا احنا معاكم ونفسنا نتجمع كلنا من جديد ..
رمضان السنه دي .. طل علينا برحمة ربنا .. بعد يوم حر اوي ربنا فرجها اوي ..
و جمعنا مع بعض ولمتنا دي خلت الجو يبقي حلو رغم الحر و زحمة الناس علي محطات البنزين ..
هو في ايه في الدنيا يستاهل نقضي حياتنا في زعل من بعض ولا نشيل حاجه وحشه لبعض و لا حاجه تخلينا ننشغل عن بعض ولا مانتمناش الخير لبعض ؟
ايه اللي باقي لينا غير حبنا و صلتنا لارحامنا ؟
ايه اللي هيفضلنا من الدنيا غير الذكريات الحلوة ال بنسيبها لبعض ؟
الناس الغاليه علينا بتسبقنا علي الجنه وانا نفسي نكمل اللي فاضلنا بكل حاجه تساعدنا نقابلهم في الجنة بجوها النقي و اوركيدها الساحر ..
كل سنه وانتم طيبين ويارب دايما بروحكم الحلوه حواليا ..
ويارب افرح بفرحة كل اللي بحبهم و مش حواليا ..
ويارب يجمعنا دايما علي خير .. دعواتكم ..
https://soundcloud.com/max-richter/02-on-the-nature-
of-daylight
.jpg)
