#Post Title #Post Title #Post Title
Sunday 28 August 2011

عيد فطر سعيد .. بوكيه ورد لروحكم الحلوة


كل سنة وأنتم طيبين..
وأنتم مبسوطين و سعداء و بتحققوا كل حلم جميل في حياتكم
كل سنه وإحنا اخوات وإيد واحده و روحنا ونبضنا مصر وفلسطين
و كل بلاد المسلمين و الطيبين
كل سنه و قلوبنا بتحب بعض في الله .. وبنسأل علي بعض في الله وبنشارك الأطفال فرحتهم وبنلعب معاهم لعبهم وبنزور ربنا سبحانه وتعالي بزيارة مريض شفاؤه ودنا

رمضان بيودعنا .. بعد ما جالنا بسرعة أوي بيمشي بسرعه أوي ومالحقناش نرحب بيه قبل ما يمشي ويفرحنا بفرحة عيده السعيد بعتلنا رسالة في
ليلة القدر وبيقولنا..
مبروك لكل الناس اللي ربنا عتقهم من النار وعفي عنهم في ليله القدر.. والحمدلله انه بلغنا ليله القدر انا بحبك قوي يارب ♥♥

بعتلنا الرساله الجميله مع يويا بنوته ..
أول ما شفت الرساله علي بروفايلها فرحت و عبست لخوفي أن يمر رمضان بلا طوق النجاة .. فأنت يا رمضان تكرارك نادر جداً في الحياه ..
اللهم اجعلنا في هذه الليلة من الذين نظرت اليهم نظرة عفو وانزلت عليهم رحمتك ورضيت عنهم .. وغفرت لهم واعتقت رقابهم من النار.. اللهم بلغنا ثوابها ..
اللهم ارزقنا بالجنة برحمتك يا كريم
..اللهم أمين

كل سنه وانتم طيبين يا غاليين ..

كل عام وانتم بخير .. وردة بكل الحب أُهدِيهاَ لأمي الغالية

أٌهديها علي قبر والدي رحمة الله عليه

أٌهديها لعائلتي الكريمة و أصدقائي الغاليين

أهديها لريماس بعبق الغاردينيا

أُهديها وجع البنفسج و حمزة الفلسطيني وسارة وصلوها بحب مصر لفلسطين

أُهديها لجروب كلمات الراقي .. وأغلي أصدقائي " المدونين"
أٌهديها لكم كلكم .. و بعتذر علي تأخيري في ردي علي مشاركتكم الجميلة وإهتمامك بكلماتي البسيطة هنا في بوكيه الورد
عشان كدا أهديت ورودي لريماس و وجع البنفسج
لشعوري بالتقصير في ردي عليهم وعلي كل روح جميلة فيكم
ولو احصيت عدد حبي لكم أخاف أنسي إسم وأنتم بقلبي رغم الوقت والمسافات
فتقبلوا مني الاعتذار و تهنئتي من قلبي بالعيد السعيد اللي بتمني تفرحوا فيه معانا وتشاركونا كل لحظة ومناسبة سعيدة
نفرح سوا أول يوم بعد صلاة العيد بإيفنت أخي العزيز إبراهيم عادل الامام
وشباب المنصورة الحلوين HIKД ˚͜˚

والفكرة .. إننا هنتجمع في ستاد المنصورة الرياضي بعد صلاة العيد وهنستني شوية لحد ما نأمن خروج الناس والشيوخ و إخواتنا البنات في أمان .. وهنتجمع كلنا شباب وبنات و أطفال و عائلات في النادي الاجتماعي ..كل واحد في جيبه مسدسه ورشاشه.. في ايده ازازة المياه بتاعته وكيس مايه كبير وهنبتدي نغرق بعض بالمياه لحظات صغيرة زي مهرجان للفرحة ممكن تكون غريبة في نظر ناس كتير منهم أ.غادة .. بحترم وجهة نظرها لما قالت : في السنة اللي بنبوس فيها أيادي دول حوض النيل عشان يسيبولنا النيل بتاعنا . في السنة اللي اتصالات عاملة حملة إسمها عطشان يا صبايا عشان الناس اللي عايشين في حضن النيل و مع ذلك بيسفوا تراب ، في السنة اللي بيموت فيها الآلاف من الفشل الكلوي عشان ماعندهومش ماية نضيفة يشربوها ، في السنة اللي أنا لسه بافتح فيها حنفية الماية بتنزل منها في أيام لون الكوكاكولا ...إخواتنا الفرافير عاملين حرب مسدسات الماية في الكوربة.. المرح حلو

وعشان كدا حبيت أوضح حاجات بسيطة .. من حقنا كلنا نفرح بالعيد طالما الفرح دا مش هيأذي حد ولا هيجرح مشاعر حد خصوصاً لما يكون الفرحه دي منظمه و بتجمع فيها شمل القرايب والأصحاب وللحظات بنشارك فيها طفل فرحته و بنشارك كلنا ايد واحده قبل دخولنا برسم دخول رمزي نقدر نشارك بيه للتبرع لاخواتنا في الصومال وبطريقة جديدة و جميلة زي دي .. وكل ال بيقدر يشارك اكتر يشارك
وربنا سبحانه وتعالي يجازيه كل خير .. يارب
حبيت أقول ان ال هيشارك في اليوم دا مش فرافير زي ما شافتهم كاتبه لها وزنها ولها كتابات تحترم و تستحق التقدير .. الشباب دول هما نفسهم ال كانوا واقفين قدام عينيا من الزهراء للسلام للاستاد بيحموا بيوتنا كلنا واقفين إيد واحده من غير ما ينزلوا ميدان ولا تحرير و فاكر لما لاقيت إعلان ترشيح صديق أحترمه لعضوية رئاسة مجلس ادارة ستاد المنصورة ومكتوب تحت اليافطة .. إسمه وأنه كان واحد من ال نزلوا في ميدان التحرير .. وانا قولتله مش لازم تكون نزلت التحرير لأن وجودك حوالين أهلك وبيتك اكبر من إنك تنزل ميدان وبيتك في خطر ..
وأنا لا أخجل أن أقول إن أول مره في حياتي أشوف ميدان التحرير بصورة مباشرة
كان يوم لقاء المدونين الجميل يوم زيارة مستشفي أبو الريش الياباني ..
يوم 21/8/2011 الصور هنا
وصلنا من مترو السيدة زينب لمحطة أنور السادات ( التحرير )
في اتجاهنا لمقهي البورصة ..
بصيت حواليا لاقيت عربيات أمن مركزي .. ومدرعات جيش و في ضهري صينية كبيرة حواليها عساكر مغلوب علي أمرها صعبوا عليا وقفتهم وسألت الغالية فاتيما .. هو في إيه هنا ؟ رد أحمد سكر و رامي دي موقعة الصينية عشان كدا عاملين عليها طوق أمني
استغربت وبعفوية قولتلهم انا نفسي اشوف (( ميدان التحرير ))
طبعاً في اللي قالي إنت بتهزر!!
واستغربوا إن اكون صديق لأحمد سووو و ضيااء و إينااس و ماكونش نزلت ميدان التحرير؟
وكان ردي ببساطه ان التحرير كان موجود فعلاً في المنصورة و مشاركتي كانت في بلدي الغاليه المنصورة واللي دور أي شهيد فيها و مصاب و شرطي محترم مايقلش عن كل واحد كان في التحرير .. قاطعني بائع الكبريت .. وقالي / المكان دا يابني هاتحكي لابنك في يوم عنه و عن روحه وتفتخر انك شاركت في ثورة ضد الظلم

نرجع لموضوعنا .. عاوز أقولكم كان نفسي أوووي اوووي أنفذ وعدي اللي وعدته في يوم للأطفال و المرضي في مستشفي الأورام بالمنصورة .. يوم ما زرناهم أخر مره .. بزيارة جديدة ليهم ونفرح معاهم ودا حقنا نفرح .. مهما اتبص لفرحتنا بطريقة سلبية فكلنا قلوبنا مليانه هموم .. خلونا نطلع منها بفرحة متأزيناش ولا تازي حد
دي فكرتي ودي وجهة نظري قدام ربنا سبحانه وتعالي
بشوف اعلانات ايجابيه لمستشفيات في التلفزيون وبكون فرحان بمشاركة القادر و الفقير ولو بزيارة لأخواتنا يارب يشفيهم .. و بلاقي مستشفيات محتاجة المشاركة و إعلانتها قليلة زي
" مستشفي مركز الأورام جامعة المنصورة "

بتمني ننظم يوم ونعمل ايفنت من خلال مشاركه ايجابية لأعضاء ستاد المنصورة وفريق العمل مع أصدقائنا.. المصورين نادي الكاميرا بالمنصورة
Mansoura Camera Club
هاني سرحان وصلاح سليم و فريق العمل الراقي لإيفنت شوارع

.. رانيا الزهيري و فاطمة و ندي الياسمين بمشاركاتهم الايجابية السابقة و نعيد علي الاطفال في المستشفي و نشاركهم يوم جميل
كل سنه وانتم طيبين وليكم أجمل الامنيات

وكحك العيد علي ذوووق سمو الأميرة نيفين

والفرحة في هدايا لعيونكم :))
واطيب دعواتي أهديها بوكيه ورد لكل روح جميلة في حياتي

شكراً مرمر علي سفرتك الحلوة طول شهر رمضان المبارك

[ Read More ]
Saturday 13 August 2011

20-8-2011 أبوالريش لَوِنُ الخَيرُ في رَمَضَانُ

كل سنه وأنتم طيبين .. رمضان كريم يقربنا يفكرنا بأحلي الذكريات
ينقي روحنا أكثر فتزداد حياتنا معني وقيمة و بريقاً

ماننساش السنه اللي فاتت لما زرنا مستشفي ابو الريش الياباني

و قضينا وقت جميل وإحنا بنشارك الأطفال سؤالنا عليهم .. حسينا الامهم ولحظات صمتهم .. يارب اشفيهم و أزح عنهم مرضهم .. وكانت دعواتنا ليهم يقينا في الله سبحانه وتعالي أن يتم شفاؤهم علي خير جمعنا التبرعات و نظمناها بشكل لطيف مع الهدايا اللي جاتلهم "ونولنا فرصة جديدة للإحساس بالسعادة بشكل مختلف" .. الحمدلله

.. قبلة علي وجنتي الصغيرة هناك .. وإبتسامة علي وجوهنا و نقدم لها الهدية الصغيرة
و الظرف المغلق في يد والدتها .. مداعبة للطفل المسترخي هنا .. إسمك ايه يا حبيبي ؟ يبتسم ابتسامة ناصعة بلا رد .. يرد عنه أبوه إسمه محمد .. إدعوله مش قادر يتكلم دلوقتي .. يا الله احفظ هذا الوجه .. محمد بيبتسم وكان التعب قد فارق جسده
أد كدا زيارة ا
لمريض بتخفف عنه !! .. أد كدا الحاجات البسيطة دي بتفرق معاهم !! .. أد كدا احنا في نعمة .. يارب لك الحمد والشكر كما ينبغي لعظيم وجهك وجلال سلطانك

عشان كدا وصفت زيارة المريض بز
يارة الخالق العظيم الله سبحانه وتعالي ..

عن ابي هريره (رض) قال رسول الله صلى الله عليه وسلم - : إن الله عز وجل يقول : يوم القيامة يا إبن ادم ، مرضت فلم تعدني ، قال : يارب ، وكيف أعودك وأنت رب العالمين ؟ قال : أما علمت ان عبدى فلانا" مرض فلم تعده ؟ اما علمت انك لو عدته لوجدتني عنده ؟

ياابن ادم ، أستطعمتك فلم تطعمني ، قال : يارب ، وكيف أطعمك وأنت رب العالمين ؟ قال : أما علمت انه استطعمك عبدى فلان ، فلم تطعمه ؟ أما علمت أنك لو أطعمته لوجدت ذلك عندى ،

ياأبن ادم ، استسقيتك ، لم تسقني ، قال يارب ، كيف اسقيك وانت رب العالمين ؟ قال : استسقاك عبدى فلان فلم تسقه ، أما لو سقيته لوجدت ذلك عندى
اخرجه الامام مسلم فى صحيحه باب ( فضل عيادة المريض ) من كتاب البر والصله والادب ج9 ص 436 هامش القسطلاني.

*** *** *** *** ***
كان يوم جميل أوي يوم لا ينسي حفر في الذاكرة .. التقيت فيه باجمل ورود أقتنيتها في يوم رمضاني كريم .. ولم يحالفني الحظ ان اوصف اليوم وقتها بروعة وصف اختي وصديقتي الغاليه منونه صاحبة الواحد شاي المظبوط .. وكنت سعيد اوي لما كل المدونين سألوها عني .. دا اخوكي .. وكانت بتقول ايوه اخويا :))
---'--,<@ ليلتك سعيدة منونه

وهنا تقدروا تعرفوا ورودي اللي كان نفسي احكي عنهم بوصف
" منونه درويش"
ذرة سكر كنا بالحب اتجمعنا
التفاصيل هنا ..

الغالية فاتيما .. تتحدث ..
عصافير الجنة ترفرف في أبو الريش التفاصيل هنا ..
خالد همس الأحباب .. التفاصيل هنا
كيارا .. عالم مولان الجميل .. بمبي بمبي بمبي .. التفاصيل هنا

سوني 2000 .. يوم الخير .. التفاصيل هنا

يوميات شاب فقري .. كريم .. لقاء تدويني مميز .. التفاصيل هنا

كركبة دماغ .. بكل الحب .. التفاصيل هنا
خواطر شابة .. حدث في رمضان .. التفاصيل هنا
واندا .. بصراحة الخير حلو .. واصحابه احلي .. التفاصيل هنا


خلقنا الله احرار .. كنت معاهم .. التفاصيل هنا

بيطرية ومش بايدي .. أخيرا اتحقق .. التفاصيل هنا

وكمااااااااان نشر الحدث في الجريدة علي الفور .. ( سأقوم بتحديث بيانات الناشرة بإذن الله )
خٌلِدَ هذَا اليَومٌ بأحَاسِيسٌ وكلمات هؤلاء .. بوكيه ورودي ..
الذي أدعوا لهم أن يظلهم الله يوم لا ظل الا ظله


والأن .. الفرصة تعود .. وتبادر بالإستضافة
"داليا قوس قزح"

ترسم بفرشاتها معالم حلم .. لتلون بها واقع ينبض بالسعادة ..
وتدعونا لتكرار الزيارة " لمستشفي ابو الريش "
يوم السبت الموافق
20/8/2011
تدعونا لنشاركها تلوين الحياه بالوان السعادة علي وجوه الأطفال
هـــنــــــــــــــــــــــــــــــــــــــــا

دي فرصتنا نقدر نشارك في رسم السعادة مع بعض مدونين وأصحاب وفنانين ..

مواطن مصري .. شرطي مصري .. جيش مصري .. مسلم مسيحي كلنا مصريين

.. كل واحد فينا له دور في رسم الابتسامة .. نقدر نشارك بمشاركة مادية .. أولعب للاطفال .. أو هدوم للمدرسة ..

أو أدوية عندنا تاريخ صلاحيتها فعال نشارك بيها في المستشفي .. أو حتي بفرشاه و الوان نلون بيها علي وشوشهم البريئة .. الفرصة قدامنا كل يوم في أبو الريش وفي 75375 و في مستشفي الاورام في المنصورة اللي وعدتهم ازورهم ومعايا
رانيا و فاطمة الزهيري بفرساة الوانهم .. اللي كانوا سعدا بتلوين وشوشهم يومها
في شهر 9-2010

مستشفي الاورام - جامعة المنصورة


الجو هنا مختلف كتير عن أبو الريش .. هناك الاطفال علي السراير مبتتنقلش من مكانها كتير .. ومبنقدرش نطول الزيارة معاهم ..
عشان كدا بتمني نكرر الزياره هناك وفي المنصورة برعاية ندي الياسمين
ونزور كلنا كل مستشفي في بلدنا كل ما نقدر .. وإن شاء الله هنقدر

ودا كان خبر عن أبو الريش .. يحتوي علي جزء صغير من الحقيقه ياريت كان المشكلة مشكلة تكييف وبس
التفاصيل هنا

كل سنه وانتم طيبين.. ودايماً بالخير سعدا ومبسوطين ..
يالاااااااا مين قال جااااي ؟
مين هيشارك بألوان الخير في رمضان
يوم زيارة مستشفي ابو الريش ..
لَوِن الخَيرٌ في رَمَضَانُ
20-8-2011


[ Read More ]
Saturday 6 August 2011

قصة أغني سيدة في العالم .. لعلنا نتعلم منها أهديها لقلوبكم في بوكيه الورد


كل سنه وانتم طيبين .. رمضان كريم وأحلي بالصحبة الجميلة و العيلة متجمعه حوالين سفرة دايمة مع ابتسامه حلوة طالعة من القلب والملايكة حواليكوا يحلقون علي رؤوسكم يحفونكم في المسجد وفي كل صلاة بتنثر الرحيق الرباني بالرحمة والمغفرة ..
علي قلوبكم
رمضان كريم يقربنا يرقينا يعلمنا الحب في الله

بشكر حملة تدوين شهر أغسطس 2011
فكرة ورعاية .. المدونة رضوي أشرف ..

اللي اشتركت معاهم ولم اشارك بصورة مستمرة لسرعة طيران الوقت حتي الان
بعتذر عن التقصير مع تمنياتي ايجابيات رمضان العمليه تكون أكتر

مشاركتي النهاردة بتحكي عن قصة سيدة علمت الكثير معني القناعة
التي تبكيني كلما قرأت قصتها ولا امل من إعادت قراءتها لأطهر بها القلب اذا باغته حب الدنيا و قسوة المشاعر


القصة دي شوفتها في صفحة عامة لصديقة عزيزة الله يعطيها كل ما تتمني .. دايماً كانت كل مشاركتها لها مشاعر راقية .. وشاء القدر أن تُغلق الصفحة بلا انذار وبقيت القصة معلقة في ذهني أبحث عنها بمعانيها الجميلة..
عيشوا جوها النقي و لا تستغربوا دموعكم فهي دموع نقية تنقي أنفنا من شوائب الحياه .. إبتسموا بعدها وأحمدوا ربنا و دعونا يداً واحده لانقاذ كل جائع في الصومال و كل فقير محتاج ليد العون وليكن رمضان خير حافز

--------------------------------------------------------------------------------------

قصة الحَاجه كُرمه .. هذه القصة لقلوبكم

----------------------

اتصلت سيدة عجوز "ببنك الطعام "تطلب حضور مندوب لإستلام خمسة بطاطين

تبرعا منها لصالح

ضحايا السيول وتركت عنوانها بالتفصيل

ميدان ثم شارع ثم حارة ثم حارة أخرى ثم دكان بقال ثم بيت!

وصل مندوب البنك بصعوبة بالغة إلى مكان إقامة السيدة العجوز، فوجدها عجوزا أكثر مما تصور،

هزيلة أكثر من أى توقع، بسيطة أقل من كل فقر، تسكن غرفة صغيرة لا تدخلها الشمس تحت بئر سلم

استقبلت موظف البنك باشتياق شخص يبحث عن ضوء فى عتمة، أصرت على أن تعد له واجب ضيافة كوب من الشاى وهى تقدمه قالت له:

«الشاى يا ابنى من يد خالتك كرمة، بالهنا والشفا، والله كوبياتى نضيفة وزى الفل، ماتقرفش».

كان الموظف الشاب يشرب الشاى وهو يراقب عروق وجهها تنتفض وهى تحكى منفعلة وكان مندهشاً،

:تصرخ في وجع

«.. ماتستغربش، أنا فقيرة آه.. بس فيه اللى أفقر منى، أنا معاشى من جوزى الله يرحمه 300 جنيه،

جبت بمتين وخمسين منهم البطاطين ديه، وهتدبر لغاية آخر الشهر بالخمسين، ربنا بيبعت!».

غرفة لا تتسع أكثر من شخصين، سرير صغير يتحمل بصعوبة جسدها النحيل

لمبة فى السقف وتليفزيون بإيريال معلق على شباك المنور، تليفون موبايل قديم يبدو أنه نافذتها الوحيدة مع الحياة

وابتسامة دافئة كبيرة تكشف عن زمن بعيد لم تعرف فيه أبعد من هذه الغرفة ومن هذا المكان

-..«لكن ياحاجة كرمة، يعنى ماتفهمنيش غلط واستحملينى، مش برضه أنت أولى بحق الخمس بطاطين، ظروفك يعنى.. »..

وتخبط يدها على طرف السرير فيهتز وتقول بعبارات لا زيف فيها ولا تراجع:..

«..يا ابنى اللى شفته فى التليفزيون يقطع القلب، ناس عريانة مرمية فى الشوارع من غير لا بيت ولا غطى،

أنا فقيرة بس مش غلبانة.. هم غلابة ولو كانوا مش فقرة، أنا ربنا ساترنى فى أوضة باقفل بابها تدفينى وأنام.. هم ماعندهمش لا باب ولا أوضة، يا أبنى خد البطاطين وتوكل على الله الحق ابعتها لحد محتاج قبل ما الليل ييجى،

توصل بالسلامة وشرفتنى يا ابنى..».

ذهب الموظف بأغلى خمس بطاطين إلى مقر بنك الطعام وحكى لهم ودموع كثيرة فى عينيه قصة الحاجة كرمة، كرمها وكبرياؤها ووجهها الصافى الصادق وكلماتها البريئة الحقيقية، حكى لهم عن علاقتها مع الله، هذه المرأة العجوز التى نساها الزمن لم يهملها الله برحمته فرزقها الحب

والبساطة والشجاعة، هذه امرأة لاتخاف أحدا، لاتخاف الفقر ولا الجوع والبرد

ولا المرض ولا الموت

تحب الله وتعيش فى أمانه وفى وعده الحق لها، حكى قصة امرأة نظنها أنها تعيش على هامش الحياة.. بينما هى الحياة نفسها

قرر زملاؤه أن يفعلوا أى شىء لهذه المرأة، اقترحوا معاشا شهريا، معونة عاجلة، البحث عن شقة صغيرة لها، سرير أكبر، ثلاجة بها طعام، فسحة فى مكان جميل، لكن موظف البنك الذى ذهب لها قال لهم بثقة من عرفها عن قرب إنها سترفض كل شىء

فى النهاية وصلوا إلى حيلة، اتصلوا بها على أنهم من شركة التليفونات التى تحمل أحد أرقامهم، أبلغوها أنها فازت بجائزة مالية كبيرة، فقالت لهم دون أن تهتز من فرحة أو مفاجأة:.. «.. عارفين بتوع" بنك الطعام "،،، إتبرعو لهم بالفلوس كلها، قولوا لهم يجيبوا بيها بطاطين كتيرة لبتوع السيول، ماحدش بيموت من الجوع.. بس فيه ناس كتير بتموت من البرد

«.. عارفين بتوع" بنك الطعام "،،، اتبرعو لهم بالفلوس كلها، قولوا لهم يجيبوا بيها بطاطين كتيرة لبتوع السيول، ماحدش بيموت من الجوع.. بس فيه ناس كتير بتموت من البرد

«.. عارفين بتوع" بنك الطعام "،،، اتبرعو لهم بالفلوس كلها، قولوا لهم يجيبوا بيها بطاطين كتيرة لبتوع السيول، ماحدش بيموت من الجوع.. بس فيه ناس كتير بتموت من البرد

======================

حقاً إن الغنى الحقيقى ينبع من قناعة النفس وإيمانها بخالقها

======================

أصدقائي الغاليين
قصدت تكرار أخر مشهد لأطهر قلبي من كل شائبة قد تتعلق يوماً بالدنيا
أردت أن اشارككم روعتها و أهديكم احساسها وانا أعلم جيداً مدي احساسكم ومشاعركم الجميله
فقط اهدوها لكل من تحبوا .. زوروا بها روح قد يحيط الغبار حولها
إدعوا للحاج كرمه ومن يمثلها من نساء العالمين ..

إدعوا للحاجه " أم ابراهيم " التي توفت وهي ساجدة في صلاتها لله رب العالمين
أن الاوان لنا الان أن نفكر قبل أن نهدر طعامنا الزائد في رمضان ليقتات منه عصفوراً صغير
ويترك الباقي لنحاسب عليه


أنثروا القمح على رؤوس الجبال لكي لا يقال جــاع طيــر في بلاد المسلميــن " - عمــر بن عبــد العزيــز

لن نضيع الوقت ليصل أهل الصومال الشقيقة برقية اعتذار منا .. تقول عذراً يا اهل الصومال فليس فينا عمر !!

فعمر باق في قلوب الطيبين في كل الارض ..

إستمتعنا بالقصة الجميله .. طهرنا عيونا بدموع الرقي .. بإدينا نشير ونشارك بالخير في رمضانا الكريم

Other Link On FaceBook

65 LE : feed one Somali for a month
140 LE : Open buffet Iftar @ Chilli's for one person!!!!!
400 LE: feed one Somali family for a whole month!
500 LE : @ Mori Sushi for 2 persons!!!!!

...
..."YOU CHOOSE"

Call (0111116808) or (0104002121) "Eti7ad Atiba2 El Arab" any time and ur donations will be collected right at ur doorstep!
(copied..Thanks Doaa Nabil & All My Friends جزاكي الله كل خير )


جزاكم الله كل خير أعز الناس .. بوكيه الورد

Mohamed Metwali abd el aziz ..
[ Read More ]